Ньурбатааҕы инбэлиит, доруобуйаларынан хааччахтаах оҕолору реабилитациялыыр кииҥҥэ «Уратылаах оҕолор — дьиэ кэргэн иэйиилээх эйгэтэ» төрөппүттэргэ аналлаах регионнааҕы конференция буолла. Улуус баһылыгын социальнай боппуруоска солбуйааччы Леонид Ким доруобуйаларынан хааччахтаах оҕолору реабилитациялыыр киин дьиэтин кэҥэтэр туһунан эттэ.
Реабилитационнай киин үлэтэ аҥардас доруобуйаларынан хааччахтаах оҕолору чөллөрүгэр түһэриинэн буолбакка, бүттүүн дьиэ кэргэни хабан үлэлэтэрэ туспа методиканан буолар. Доруобуйаларынан хааччахтаах оҕолор уопсастыбаҕа бэлэм буолалларыгар дьиэ кэргэн оруолун үрдэтиигэ болҕомтоҕо ылан, оҕо саадыгар, оскуолаҕа, тулалыыр эйгэҕэ дьиэ кэргэнинэн бэлэмнииргэ үлэ барара тула өттүттэн туһалааҕын конференцияҕа кэпсэттилэр. Ньурбатааҕы кииҥҥэ Саха сирин араас муннуктарыттан, куораттан тиийэ кэлэн оҕолор реабилитацияны бара сылдьаллара оҕо-аймахха көмөлөөх тэрилтэ буоларын дакаастаата.
Өрөспүүбүлүкэҕэ 25 төгүллээх хайыһарга чөмпүйүөн, спортсмен, Дархан этээччи С.И. Черноградскай, АГИКИ социальнай үлэҕэ кафедратын доцена, педагогическай наука кандидата В.А. Тарасова кыттыыны ыллылар.
Педагогическай наука кандидата Василиса Тарасова мустубут төрөппүттэргэ доруобуйаларынан хааччахтаах оҕолорго сыһыаннаан кэпсэтии ыытта, боппуруостарга эппиэттээтэ. «Мин сокуоннай саастарын туола илик оҕолору социальнай-култуурунай иитии ньыматыгар уонна доруобуйаларынан хааччахтаах оҕолору кытары үлэлэһэбин. Бэйэм оҕо сааспыттан харахпынан II группалаах инбэлиит буоларым быһыытынан, төрөппүттэри кытары көрсөн бэйэм уопуппуттан атастастым. Оҕо эрдэхпиттэн төрөппүттэрим миэхэ күүс-көмө, өйөбүл буолан харгыһа суох эйгэҕэ ииппиттэрэ инники олохпор улахан көмө буолбута. Кииҥҥэ хаһыс да төгүлүн сылдьар оҕолор көрдөрүүлэрэ үчүгэй, кинилэр улааттахтарына туох күүтэрин, олоххо туһалаах киһи, үлэһит буоларга бэйэлэрин холонон көрөллөр эбит”, — диэтэ кини.
Киин үлэтин туһунан С.И. Черноградскай оҕо эрдэҕиттэн хас да операцияны ааспыт, кыайан саҥарбат инбэлиит сиэннээҕин эттэ. Иккитэ Нерюнгритааҕы реабилитационнай кииҥҥэ, Москваҕа тиийэ эмтэммиттэрин, реабилитационнай киин туһунан өйдөбүлү үчүгэйдик билэрин туһунан холобурдаан кэпсээтэ. «Мин өрөспүүбүлүкэ таһымнаах, дьиэлээх-уоттаах, базалаах реабилитационнай киини көрөн олус сөхтүм. Кыайан саҥарбат оҕолору саҥардан, хаампат оҕолору үҥкүүлэтэн улуустааҕы куонкуруска кыттар буолбуттара үлэлэригэр бэриниилээх специалистар буолалларын дакаастаатылар. Дьиэни кэҥэттэр санааны ылынан былаанныыллара саамай сөптөөх«, — диэтэ олоххо дьулуурдаах киһи.
