Улуу Кыайыы 75 cылыгар анаан Ньурбатааҕы судаарыстыбаннай көһө сылдьар драматическай театр Аҕа дойду улуу сэриитин кыттыылааҕа, Нам Бөтүҥүтэн төрүттээх саха хорсун кыыһа Мария Слепцова дьиҥнээх олоҕор тирэҕирбит «Мария – Кыайыы саллаата» моно-испэктээк туруорбута. Ньурба драмтеатра бу нэдиэлэҕэ А. Шестаков аатынан норуот айымньытын дьиэтигэр ону көрдөрдө.
«Мария – Кыайыы саллаата» пьеса ааптардара Былатыан Ойуунускай аатынан Саха Академическай театр артыыската, СР үтүөлээх артыыһа Софья Баранова, Бөтүҥтэн төрүттээх, литературнай чаас сэбиэдиссэйэ, театральнай кириитик Ангелла Попова буолаллар. Испэктээги СР культуратын туйгуна Алгыс Макаров режиссердаан туруорбут. Сүрүн оруолу Арбынтан төрүттээх Анисия Колесова толорор. Бүгүн Анисияны көрсөн пьеса туһунан кэпсииригэр, бэйэтин билиһиннэрэригэр көрдөстүбүт.
«Нам улуһугар кэлэммит Арбыҥҥа, Көбөкөҥҥө, Хатырыкка, Бөтүҥҥэ, Кыһыл Дэриэбинэҕэ сырыттыбыт. Онтон улуус киинигэр, сарсыныгар Партизаҥҥа. Муус устар 2 күнүгэр Дьокуускайга Саха театрыгар көрдөрөбүт. Моно-спектакль хорсун буойун кыыс туһунан. Ньурба театра тэрийэр «Сата» диэн фестивальбытыгар ааптардар кэлэ сылдьаннар суруйбут пьесаларыгар миигин барсыан сөптөөх диэн көрбүттэр.
Спектакль геройа Мария Слепцова Нам Бөтүҥүттэн төрүттээх, мин эмиэ Арбыммын. Онон биир дойдулааҕым буолар, миэхэ чугас курдук. Ааптардар дьиҥ олоххо буолбут түгэни суруйбуттар. Буойун төрөппүт кыыһа, педиатр идэлээх, билигин Дьокуускайга олорор Ирина Кириллинаны кытта ыкса үлэлэспиттэр. Эппиэтинэстээх оруолу оонньуурбуттан олус долгуйбутум. Тылбын илиибиттэн араарбакка үөрэппитим, киэһэ утуйарбар, сарсыарда турарбар саныырым. Көмө оруоллар бааллара туһалыыр, эрэх-турах сананабын», — диэн кини кэпсээтэ.
Артыыска культура уонна искусство колледжын төрүт культура салаатын бүтэрэн, билигин Ньурба театрыгар үлэлиир, диэн суруйда Семен Аргунов @gazeta_enseli
