Ойууру көҥүлэ суох, кистээн кэрдэр киһи РФ Холуобунай кодексатын 260-с ыстатыйанан холуобунай эппиэккэ тардыллар.
Ньурба улууһугар 40 саастаах С. диэн киһи ити ыстатыйанан холуобунай дьыалата суут мунньаҕар көрүллэн, бириигэбэр тахсыбытын туһунан СӨ Борокуратуурата иһитиннэрдэ.
Суут быһаарбытынан, бу киһи 2015 сыл ыам ыйыгар Хатыы сэлиэнньэтиттэн 5,5 км ыраах сытар сиргэ «Дружба» эрбиинэн тиити төрдүттэн эрбээбит.
Маныаха кини РФ Ойуурга кодексатын ирдэбиллэрин кэһэн, ойууру кэрдиигэ көҥүлэ суох сылдьан, 97,25 куб. м иэннээх 312 тиити суулларбыт. Ити сокуоннайа суох дьайыытынан 221.827 солк.суумалаах хоромньуну таһаарбыт.
Сууттанааччы буруйун сороҕун эрэ билиммит, маһы атыыга диэн буолбакка, бэйэтигэр туһанаары кэрдибитин быһаарбыт.
Ол эрэн, судаарыстыбаннай буруйдааччы (борокуруор) С. диэн гражданин 260-с ыстатыйа 3-с чааһынан көрүллэр буруйун толору дакаастаабыт.
Суут накаастабыл миэрэ быһыытынан, 1 сыл 6 ыйга көҥүлүн быһары усулуобунайынан ааҕан, 1 сыл тургутар болдьоххо уурбут. Бириигэбэр сокуоннай күүһүгэр киирбит.
