Күндээдэ нэһилиэгэр «Региональнай сайдыы» ХЭТ бэйэтин үбүнэн 50 миэстэлээх «Кэнчээри» оҕо саадын ааспыт сыл муус устарыттан тутуутун саҕалаан, болдьоҕун иннинэ үлэҕэ киллэрдэ. Кэлэр сылга Дьиикимдэ нэһилиэгэр 35 миэстэлээх оҕо саада үлэҕэ киирэрэ былааннанар. Федеральнай бүддьүөттэн кыттыгас үбүлээһининэн быһаарыллан, Ньурба куоратыгар сэтинньи ыйга 280 миэстэлээх оҕо саадын сыбаайата түһүөхтээх.
«Кэнчээри» оҕо саадын үөрүүлээх аһыллыытыгар ыраахтан чугастан-ыалдьыттар кэллилэр. Таркаайы нэһилиэгин бочуоттах олохтооҕо, «Аар-Айыы» итэҕэлин XI кэрдиистээх алгысчыта, үрдүкү категориялаах норуот эмчитэ Алиса Михайловна Иннокентьева сахалыы сиэринэн-туомунан алҕаан аста. «Ньурба оройуона» МО баһылыга Алексей Иннокентьев, СӨ Ил Түмэн Судаарыстыбаннай мунньаҕын вице-спикерэ Антонина Григорьева, «Региональнай сайдыы» ХЭТ Ньурбатааҕы тэрилтэтин салайааччыта Альберт Васильев, СӨ үөрэх уонна наука министиэристибэтин ресурснай хааччыйыы Киинин дириэктэрэ Василий Петров, улуустааҕы үөрэҕирии управлениетын салайааччыта Алевтина Аргунова, оҕону сайыннарар киин салайааччыта Венера Степанова аалай кыһыл лиэнтэни үөрүүлээх быһыыга-майгыга быстылар.
Дьыссаат дьиэтин болдьоммут бириэмэтигэр ситэрэн-хоторон туппут «Региональнай сайдыы» ХЭТ Ньурбатааҕы тэрилтэтин салайааччыта Альберт Васильев символическай дьиэ күлүүһүн уһуйаан салайааччытыгар Венера Степановаҕа үөрүүлээх түгэҥҥэ туттарда. «Ньурба оройуон» МО баһылыга Алексей Иннокентьев Күндээдэ нэһилиэгин дьонун-сэргэтин, алын сүһүөх оҕолорун саҥа оҕо саада үлэҕэ киирбитинэн, Ньурба улууһун дьонун-сэргэтин, тус бэйэтин аатыттан эҕэрдэлээтэ. «Күндээдэ нэһилиэгэ» МТ баһылыга Юрий Васильев чуолаан тутааччыларга, улуус баһылыгар А.М.Иннокентьевка, ИСУ салайааччытыгар М.С.Семеновка, үөрэҕирии управлениетын салайааччытыгар А.П.Аргуноваҕа махтанарын биллэрдэ.
Кэлбит ыалдьыттар, оройуон Сэбиэтин бэрэссэдээтэлэ С.И.Евсеев тыл эттилэр, оҕо саадыгар үлэлээн ааспыт бэтэрээннэргэ эҕэрдэ, махтал суруктары туттардылар. Кырачаан иитиллээччилэр кэнсиэр көрдөрдүлэр.
Ааптар Антонина СЕМЕНОВА, Ньурба улууһа
