29 Кулун тутар 29.03
  • -12°
  • $ 92,26
  • 99,71

Ньурба тимуровецтара быйыл сүүс ыалга көмөлөстүлэр

14:37, 18 декабря 2018
Текст:
Читайте нас на
Яндекс Новости
ЯДВ

Быйыл Арассыыйаҕа Көҥүл өттүнэн көмөлөһөөччү сыла түмүктэнэн эрэр. Бөдөҥ тэрилтэлэргэ федеральнай бырайыактарынан, бырагыраамаларынан, сокуон бырайыактара ылылланнар үлэ барда. 2018 сылга Ньурба улууһугар уопсайа 100-тэн тахса ыалга көмө оҥоһулунна.


Ньурба ыччата тимуровскай хамсааһыҥҥа көхтөөхтүк кытынна, улуустааҕы уопсастыбаннай Сэбиэт бэрэссэдээтэлэ Павел Необутов, 2017 сыллаахтан бу дьыаланы салайар. Хаар күрдьээһинэ, мас хайытааһына курдук үлэлэр ыытылыннылар. Кыаммат-түгэммэт дьиэ кэргэннэргэ аһынан, таҥаһынан, Араҥастаахтааҕы «Сайдыс» оскуола-саад оҕолоругар кинигэ, тэтэрээт атыылаһан аһымал аахсыйалары тэрийдилэр. Уопсайа 100-тэн тахса ыалга көҥүл өттүнэн көмө оҥоһуллубут.

— Быйыл Арассыыйаҕа Көҥүл өттүнэн көмөлөһөөччү сылыгар куорат оскуолалара, Ньурбатааҕы техническэй оҕо дьоҕурун сайыннарар киин, РДЮСШ оҕолоро тимуровскай хамсааһыҥҥа бэйэлэрин баҕа санааларынан хаар күрдьээһинигэр, мас хайытааһыныгар кыттыыны ылбыттарыгар салайааччыларыгар махталбытын тиэрдэбит, — диэн Павел Необутов этэр.

Ньурба куоратыгар олорор соҕотох олорор аҕам саастаах дьоҥҥо дьиэлэрин сарайдарын уларытыыга, олбуору оҥорооһуҥҥа чааһынай урбаанынан дьарыктанааччылар күүс-көмө буоллулар.

 

Бу сыл кулун тутар 6 күнүгэр Ньурбаҕа «Форум для тех кто действует…» зонатааҕы Гражданскай форумҥа Бүлүү бөлөх улуустара уонна Дьокуускай куораттан СӨ Уопсастыбаннай палаататын бэрэссэдээтэлэ Алексей Сергучев кыттыбыттара. «Форумҥа олохтоох салайыныы уорганнара, коммерческайа суох уопсастыбаннай тэрилтэлэр (НКО-лар), барыта 265 киһи кыттыыны ылбыта. Форум кыттыылаахтара бэйэ-бэйэбитин кытары билсэн, сүбэ-соргу ылсыбыппыт, — диир  тимуровскай хамсааһын салайааччыта. — Быйыл Бүлүү эбэбит уута киртийэн, алдьархай ааҥнаабытыгар биһиги туора турбакка, массыыналарбытынан тахсаммыт кыаммат-түгэммэт дьиэ кэргэннэргэ, бэтэрээннэргэ «Баай ууттан» (ИП Харламов В.М.) «Ньурба куорат» МТ оҥорбут испииһэгинэн босхо уу таспыппыт. Онтон чааһынай урбаанньыттар Илья Владимирович Федоров тутуу маһынан, «Масстрой» ХЭО Владислав Афанасьевич Торохов оттук маһынан хааччыйбыттарын бүгүн бэлиэтээн ааһар тоҕоостоох.»

Муниципальнай тэриллии баһылыктарын өттүттэн бэйэ баҕа өттүнэн көмө оҥорооччуларга, волонтердарга өйөбүл баар буоллаҕына, ол нэһилиэк ыччата ордук түмсүүлээх буолар.

— Аан дойдуга көҥүл өттүнэн көмөлөһөөччү өрүү уопсастыбаҕа наадалаах киһинэн ааҕыллар, онон биһиги дьоҥҥо көмө оҥорорго хаһан баҕарар бэлэммит, — диэн түмүктээтэ Павел Необутов.

Автор: Антонина СЕМЕНОВА, «Ньурба» хаһыат

Следите за самым важным и интересным в Telegram-канале и WhatsApp-группе ЯСИА