Балаҕан ыйын 23 күнүттэн Ньурба к. Степан Васильев аатынан сүрүн уулуссатыттан салгыы, кэтэһиилээх аспааллааһын саҕаланна. Биригээдэ ыстаарсайа Михаил Уаров кэпсииринэн, 20-тэн тахса буолан үлэлииллэр. 1 грейдер, 1 асфальтукладчик, 1 каток үлэлии сылдьаллар.


Хирургия балыыһатын таһыттан саҕалаан, балтараа биэрэстэ усталаах уулусса учаастага аспаалланыахтаах.

Бүгүн аспаал бастакы, ол эбэтэр «пористай» араҥата оҥоһуллар. Бу кэнниттэн үрдүнэн аспаал иккис, чиҥ араҥата ууруллуохтаах.

Улууска алмаастан киирэр үп суотуттан 900 м аспааллыырга аукцион ыытыллан, РИК «Автодор» АУо кыайбыта. Улуус салалтатын кытта сөбүлэҥ быһыытынан, сороҕун эһиил төлүүргэ кэпсэтэн, тэрилтэ бэйэтин суотугар эбии иэс үлэлиэхтээх. Бу түмүгэр Ньурба куоракка киириигэ суол саамай куһаҕан учаастага оҥоһуллан тупсуоҕа.

«Бүлүү» федеральнай суол кытыытыгар, Октябрьскай нэһилиэгин сиригэр аспаал-бетон собуота аспаалын бэлэмнээн үлэлии турар. 1 погрузчиктаахтар, итиэннэ 4 самосвал аспаалы таһар.

Барыта этэҥҥэ буоллаҕына, суол тутааччылар үлэлэрин аныгыскы ыйга бүтэрэргэ былаанныыллар.

Ааптар: Геннадий АНТОНОВ.

0
0
comments powered by HyperComments