Хорула нэһилиэгэр билигин 852 киһи олорор. 2015 сыл түмүгүнэн хаһаайыстыбатын ахсаана — 298, олорор дьиэтэ — 178. Нэһилиэккэ 8 уулусса баар, 3 түөлбэ үлэлиир: Аартык, Сайылык уонна Көппөх.
Олохтоох дьаһалтата иһитиннэрэринэн, 2015 сылга нэһилиэги тупсаран оҥорууга балачча үлэ барда. 1 мөл. солк. суумаҕа уулуссалар өрөмүөннэннилэр: 500 м усталаах суол кумах кутуллан үрдэтилиннэ. Онон Ленин уонна Кириллин аатынан уулуссалар туруктара тубуста. Сыбаалка ис-тас өттө күрдьүллэн чөкөтүлүннэ. Сыл устата санитарнай ыраастааһыҥҥа алта субуотунньук ыытылынна. Тэрилтэлэр тастарын уонна түөлбэлэринэн уулуссалары ыраастааһын үлэтэ барда. Олорор күөллэрин тулата эмиэ хомулунна. Манна А.И.Терентьев уонна Ю.Н.Чочанов үчүгэйдик үлэлээтилэр. Уулуссаҕа 12 уоту кэмчилиир светодиоднай лаампа туруоруллан холбонно. Тэрилтэлэринэн көҕөрдүү үлэтэ ыытыллан, мастар олордуллубуттара.
Кыайыы үбүлүөйдээх 70 сылын көрсө, «Өктөөп төлөнө» колхуос бэрэссэдээтэлэ Отчутовка саҥа пааматынньык оҥоһуллан туруоруллубута. Кини сэрии ыар сылларын кэмигэр холкуоһун сатабыллаахтык салайбыт, дьонугар-сэргэтигэр олус кыһамньылаах, дьон хоргуйуутун таһаарбатах салайааччы быһыытынан биллэр уонна ытыктанар салайааччы этэ.
Нэһилиэк көстүүтүн быраҕыллыбыт, эргэрэн туһаныллыбат буолбут тутуулар буортулууллара баар суол. Ааспыт сылга олохтоох кээпэрэтиип быраҕыллыбыт улахан гарааһа көтүрүллүбүтэ.
Бу сылга даҕаны нэһилиэккэ уулусса өрөмүөнүгэр, суол оҥоруутугар, уулуссаны сырдатыы үлэтигэр уонна биирдиилээн олорор дьиэлэри туттууга балачча үлэ барара былааннанар. Манна быйыл Ил Дархан Егор Борисов биллэрбит тупсарыныы сыла төһүү күүс буолуо.
