Ньурба улууһугар СӨ ситэриилээх былааһын 2020 с. үлэтин отчуота саҕаланна. Олунньу 17 күнүгэр Zoom былаһаакка нөҥүө Бордоҥ, Малдьаҕар, Мэҥэдьэк уонна Чуукаар нэһилиэктэрин олохтоохторо кыттыылаах онлайн эрэсииминэн барда. Муниципалитет салайааччыта Алексей Иннокентьев ыытта.
СӨ ситэриилээх былааһын 2020 с. үлэтин отчуота Ньурба улууһугар ыытыллар. СӨ Бырабыыталыстыбатын отчуоттуур бөлөҕүн тутуу миниистирэ Павел Кылатчанов салайар. Кини өрөспүүбүлүкэ ситэриилээх былааһын ааспыт сыллааҕы үлэтин билиһиннэрдэ.
Нэһилиэктэр олохтоохторо көхтөөхтүк кытыннылар, бэйэлэрин ыйытыыларын уонна этиилэрин тиэртилэр. «Ньурба-Хампах» 35 кВ линия өрөмүөнүн, үрдүк күүрүүлээх уот линиятын, Куоначчаан муостатын тутуутун, нэһилиэктэр икки ардыларынааҕы суоллары оҥорууга СӨ Суол пуондатыттан үбүлээһин кээмэйин улаатыннарыы, нэһилиэктэри үбүлээһин методикатын, дьон уопсай туһаныллар сирдэргэ балыктааһынын, Степан Васильев аатынан сылгы собуота «Саха сүөһүтэ» СӨ генофонднай хааһына тэрилтэтигэр бэриллиитин суһалсытыы, ыты кытта үлэҕэ боломуочуйа толоруллуутугар сөптөөх үбүлээһини көрүү, Интэриниэт тарыыбын кыччатыы, нэһилиэктэр сирдэригэр мелиорация үлэтин ыытан ууну киллэрии-мунньуу уо.д.а. ыйытыктар киирдилэр.
Сүрүн ыйытыыларга туһааннаах салайааччылар хоруйдарын аҕаллахха, быйыл энергетиктэр «Ньурба-Хампах» уот линиятын остуолбаларын Өҥөлдьөҕө диэри хапытаалынай өрөмүөнүн оҥорорго былаанныыллар, онтон кэлэр сылларга үлэ салгыы барара күүтүллэр. Ааспыт сылга РЭС-тэр 1 км СИП-кабельга уларыппыттар, быйыл 3 км уларытыахтаахтар. Сунтаартан Ньурбаҕа диэри ВЛ-110 кВ тутарга бырайыак оҥорорго куонкурус биллэриллибитэ, докумуоннары тутуу кулун тутар ыйынан бүтэр. Тутуу үбэ билиҥҥитэ биллэ илик. Бу боппуруоска СӨ Бырабыыталыстыбата «Русгидро» тэрилтэни кытта үлэлэһэр. Куоначчаан муостатын бырайыага оҥоһуллан, судаарыстыбаннай экспертизалаах СӨ Тырааныспарга министиэристибэтигэр киирэн сытар, сыаната улаханын иһин (900 мөл. солк.) федеральнай бырагыраамаҕа киллэрэргэ үлэ барар.
Отчуокка экология, айылҕаны туһаныы уонна ойуур хаһаайыстыбатын миниистирин солбуйааччыта Николай Додохов, экэниэмикэ миниистирин солбуйааччыта Татьяна Лебедева, үп миниистирин солбуйааччыта Надежда Филиппова, СӨ Ил Дарханын уонна Бырабыыталыстыбатын Дьаһалтатын олохтоох салайыныыга департаменын салайааччытын солбуйааччыта Афанасий Старостин, ТХМ Сүөһү иитиитин уонна племенной надзор департаменын салайааччыта Артем Александров уо.д.а. кытыннылар, суруйар социальнай ситимнэргэ улуус дьаһалтатын пресс-сулууспата.
