Быйыл өҥүрүк куйаас сатыылаан, эмискэ быстах этиҥнээх ардахтар хоромньулара наһаа улахан. Сорох сирдэргэ сымыыт саҕа кээмэйдээх тобурах түһэн оҕуруоттарын аһыттан мэлийдилэр. Ньурба улууһун Дьиикимдэ нэһилиэгэр от ыйын 13 күнүгэр сарсыарда 6 чааска чаҕылҕан кэмигэр уот ситимин кылгас тиксиһиитигэр аҕыс ыал 11 сүөһүтэ, ол иһигэр биир ыалга 3 төбө сүөһү, бииригэр 2 ыанар ынах уокка оҕустараннар улахан хоромньу таҕыста.
Ньурба улууһун тыа хаһаайыстыбатын департаменын салайааччыта Иван Васильевич Егоров манна сыһыаннаан: “Улуустааҕы ветеринарнай сулууспа уокка оҕустаран өлбүт сүөһүлэргэ акт толордо, тыа хаһаайыстыбатын департамена өлбүт сүөһүлэр төһө ыйааһыннаахтарын, хоромньу уопсай ахсаанын туһунан ыспараапка биэрдэ. Дьиикимдэ нэһилиэгин дьаһалтата уонна олохтоохтор Арҕааҥҥы уот ситимин салалтатыгар туоһулуур докумуоннары хомуйан ыыттылар.
«Ньурба оройуона» МТ мунньахтаан, улуус бүддьүөтүттэн ыанар ынахха – 40000 солк., икки сааһыттан үөһээ саастаах субайдарга – 25000, 2 саастарын туола илик кыра саастаах сүөһүлэр иһин 15000 солк. көрүллэригэр улуус баһылыга Иннокентьев А.М. тута көмө оҥорорго этиилээх таҕыста», – диэн иһитиннэрдэ.
