Ньурбаҕа ааспыт нэдиэлэҕэ улуус тыатын хаһаайыстыбатын үлэһиттэрин Күнүн бэлиэтээтилэр. Быйыл тэрээһин ордук уратылаах уонна киэҥ бырагыраамалаах буолла. Утуу-субуу ас-үөл дьаарбаҥката, агро-оскуолалар быыстапкалара, мелиорация сайдыытын боппуруостарыгар «төгүрүк остуол», Бааһынай ырыынак аһыллыыта, тыа хаһаайыстыбатын үлэһиттэрин үөрүүлээх мунньахтара  ыытылыннылар. 


Ньурбаҕа тыа хаһаайыстабытын күннэрэ быйыл хаһааҥҥытааҕар да тэрээһиннээхтик бардылар. Сарсыардаттан Ньурба куорат «Кыталык» култуура киинигэр «Идэһэ-2018» быыстапка-дьаарбаҥкаҕа улуус бары кэриэтэ нэһилиэктэриттэн кэлэн кытыннылар. Өрүһүнэн туорааһын аһыллыбыт кэмэ буолан, кыттааччы да элбэх.

Кыайыылаах нэһилиэктэргэ уонна агро-оскуолаларга, эмиэ былырыыҥҥы курдук, улахан суумалаах бириэмийэлэр олохтоммут буолан, үчүгэйдик оҥостон, тэринэн кэлбиттэр. Туох суоҕуй диэххэ айылаах, талбыт ас арааһа баар. Дьон ону сөбүлээн хамаҕатык атыыласта.

Быыстапка-дьаарбаҥка түмүгүн күн иккис аҥарыгар тыа хаһаайыстыбатын үлэһиттэрин мунньаҕар таһаардылар. Чаппанда нэһилиэгэ бастаан тахсан, 100 тыһ. солк. состоруулаах 1-кы истиэпэннээх дипломунан наҕараадаланна. Иккис — Октябрьскай нэһилиэк, үһүс Сүлэ нэһилиэгэ буоллулар. Кинилэргэ туһааннааҕынан 80 тыһ. солк. уонна 60 тыһ. солк. бириэмийэлэр ананнылар. Агро-оскуолаларга кыайыылааҕынан Маалыкай орто оскуола таҕыста уонна 30 тыһ. солк. суумалаах бириэмийэнэн наҕарадааланна. Сүлэ оскуолата — иккис, Хаҥалас оскуолата үһүс буоллулар. Кинилэргэ эмиэ харчынан бириэмийэ ананна.

Үүтү астыыр тэрилтэлэр ортолоругар ас көрүҥнэринэн дьон сыанабылынан күрэх ыытылынна, кыайыылаахтарга дипломнар туттарылыннылар.
Дьон күүппүт уонна биһирээбит саамай бэлиэ тэрээһининэн куорат киинигэр, Пушкин уулуссатыгар турар дьиэҕэ «Ньурба бэлэхтэрэ» диэн ааттаах эргиэн дьиэтин аһыллыыта буолла. Судургутук эттэххэ — Бааһынай ырыынага. Маны урбаанньыт Владислав Григорьев аста.

Улуустан 1 мөл. солк. көрүллэн, куонкурус ыытыллыбытыгар кини кыайбыта. Манна наадалаах тэриллэри атыылаһан аҕалан туруорда, дьиэтигэр өрөмүөн үлэтин ыытта. Эти, балыгы, үүт аһы атыылыыр сэттэ туочука баар. Онон дьон барытын биир сиртэн атыылаһарыгар да табыгастаах.

Улууска тыа хаһаайыстыбатын үлэһиттэрин Күнүн тэрээһиннэрин туһунан сиһилии «Ньурба» хаһыат чугастааҕы нүөмэригэр тахсыаҕа.

Ааптар: Геннадий АНТОНОВ

0
0
comments powered by HyperComments