Бу күннэргэ Ньурбатааҕы орто оскуола базатыгар Дьокуускайдааҕы медицинскэй колледж филиала аһылынна.
Бүлүү умнаһын улуустарыгар олус наадалаах медицинскэй кадрдары бэлэмниир орто анал үөрэх тэрилтэтэ улуустааҕы дьаһалта баһылыга Борис Попов, Ньурба куоратын киин балыыһатын салалтата СӨ Бырабыыталыстыбатын уонна СӨ Доруобуйа харыстабылын министиэристибэтин кытта сүбэлэсиһии түһэрсибиттэрин түмүгэр тэрилиннэ.
Үөрэх тэрилтэтэ улуус киинин балыыһатыгар үлэлии сылдьар алын сүһүөх персоналы орто анал персонал идэтигэр – медицинскэй сиэстэрэҕэ үөрэтэр соруктаах. Ол эбэтэр филиалга билигин балыыһаҕа үлэлии сылдьар уопуттаах санитаркалар эрэ үөрэниэхтэрэ. Ирдэбил быһыытынан үөрэххэ киириэн баҕалаах үлэһит бастайааннай олорор сирдээх буолуохтаах. Үөрэҕи бүтэрээччилэр 5 сыл устата киин балыыһаҕа үлэлииргэ тус сыаллаах дуогабары түһэрсиэхтэрэ.
Филиал устудьуоннара Үлэлээх буолуу киинин дьиэтигэр уонна Ньурба техническэй лицейигэр үөрэниэхтэрэ.
— Бүгүҥҥү күҥҥэ филиалга 25 миэстэҕэ 38 сайабылыанньа киирдэ. Филиал балаҕан ыйын 1 күнүттэн 35 устудьуону үөрэппитинэн барыаҕа. Ол эбэтэр 25 устудьуоҥҥа эбии 10 төлөбүрдээх миэстэ бэрилиннэ, — диэн Дьокускайдааҕы медицинскэй колледж дириэктэрэ Дмитрий Алексеев иһитиннэрдэ.
Улуус дьаһалтатын баһылыга Борис Попов филиалы үс сыл иһигэр үлэлэтэр ороскуоту бүтүннүү оройуон бюджетыгар ылан, аны аҕыйах сылынан киин балыыһаны анал үөрэхтээх кадрынан толоруоҕа.
