29 Кулун тутар 29.03
  • -13°
  • $ 92,26
  • 99,71

Ньурбаҕа кырдьаҕастарга болҕомто куруук баар

Читайте нас на
Яндекс Новости
ЯДВ

Ньурба улууһугар нэһилиэнньэ социальнай көмүскэлин управлениетыгар үрдүкү профессиональнай уопуттаах кэлэктиип үлэлиир, Арассыыйа Федерациятын уонна Саха Өрөспүүбүлүкэтин сокуоннарынан көрүллүбүт чэпчэтиилэринэн нэһилиэнньэни хааччыйыы чуолкай систиэмэтэ олохтоммут.


Билигин управлениеҕа 35, ол иһигэр дьиэҕэ социальнай көмөнү оҥорор отделение 24 үлэһитэ баар. Салайааччынан Анна Уларова буолар.

Ньурба куоратын үс бастыҥ социальнай үлэһиттэрин кытта кинилэр харалталарыгар баар хас да киһиэхэ сырыттыбыт. Социальнай үлэһиттэр көрөр-истэр дьоннорун күннэтэ санааларыттан араарбакка, кинилэр тустарыгар бары кыһамньыларын ууран туран сүүрэллэр-көтөллөр. Соҕотох кырдьаҕас, эбэтэр кыаммат инбэлиит ыалдьан дуу, атын кыһалҕаҕа эмискэ ылларан дуу ыҥырдаҕына, күнүс-түүн буоллун, ким хайа иннинэ көмөҕө тиэтэйэллэр.

А.Д.Иванова уонна Н.Н. Николаева

Кинилэртэн саамай эдэрдэрэ, социальнай үлэһитинэн алтыс сылын үлэлиир Иванова Александра Дорофеевна. Кини массыынатыгар олорсон сылдьыахтаах дьоммутугар бэрт түргэнник тиийтэлээтибит. Аан бастаан 84 саастаах нуучча кырдьаҕаһыгар, Иркутскай уобаластан төрүттээх Николаева Нина Николаевнаҕа ыалдьыттаатыбыт. Кини: «Ньурбаҕа 60 сыл олоробун, оҕолорум Кыһыл-Сыырга ыҥыраллар да, дьиэбин, оҕуруоппун быраҕан барар санаам суох. Манна миигин Александра көрөр-истэр, киниэхэ наһаа махталлаахпын. Алта сыл тухары кыыһым туох наадабар бары көмөлөһөн кэллэ. Эппиппин барытын толоро охсор, бородууктабын, эмпин аҕалар, араас төлөбүрдэрбин оҥорор. Ардыгар дьиэ хомуйааһына, ас астааһына, оҕуруот үлэтэ, үүнүүбүн батарыы кинитэ суох буолбат. Бэйэм атаҕым ыалдьар буолан, бытааммын. Кыһамньылаах үлэһиккэ дьолу эрэ баҕарабын».

Александра атах тардыстар техникалаах буолан, Чаппандаттан сылдьан үлэлиир. Онно элбэх оҕолоох эдэр ийэ кэтэх хаһаайыстыбалаах, сүөһүлээх. Бэйэтин көрүүтүгэр 10 киһилээҕин, саамай эдэрдэрэ 52 саастаах инбэлиит буоларын, уон биирис киһитин ылаары сылдьарын туһунан кэпсиир. Дьонноругар графигынан нэдиэлэҕэ үстэ сылдьар.

И.И.Николаева уонна В.М.Тарасова

15 сыл ыстаастаах социальнай үлэһит Николаева Ирина Ильинична көрөр-истэр 84 саастаах кырдьаҕаһа уопсай дьиэ иккис этээһигэр баар кыбартыыраҕа  олорор. Кини I-Хаҥалас оскуолатыгар 33 сыл учууталлаабыт педагогическай үлэ бэтэрээнэ. Тарасова Вера Моисеевна биһигини бэрт эйэҕэстик көрүстэ. Иккис этээстэн түһэрин-тахсарын ыарырҕатар буолан, Иринатыгар өйөнөн, массыына булларан кэлэр-барар. Энергетик түөлбэтин мунньахтарыгар сылдьар, соторутааҕыта «Биир ньыгыл Арассыыйа» ПП барыллааһын куоластааһыныгар кыттыбыт. Саас түөлбэлэр күрэхтэригэр киирсэн, сценаҕа тахсан туойбут. «Иринаны олох бэйэм кыыһым курдук саныыбын. Төһө да аймахтарым кэлэ-бара көмөлөстөллөр, кинитэ суох сатаммат курдукпун. Уон икки сыл тухары кэргэннэһэн хаалбыппыт. Кини олус аламаҕай, кутугунас киһи. Аспын-үөлбүн, эмпин атыылаһар, коммунальнай өҥөлөрбүн, телефоммун төлүүр, библиотекаттан кинигэ уларсан аҕалар, көрдөспүппүн барытын толоро сатыыр. Ыарыйдахпына аспын астыыр, бүөбэйдиир. Куруук телефонунан сибээстэһэ олоробут. Иринабар өйөбүлүн, сылаас сыһыанын иһин ис сүрэхпиттэн махтанабын», — диэн олоххо көхтөөх, сэргэх-сайдам киһи Вера Моисеевна этэр.

Салгыы үһүс дьиэбитигэр, эмиэ уопсай дьиэ дьоҕус кыбартыыратыгар тиийэбит. 79 саастаах доруобуйа харыстабылын бэтэрээнэ, 1961-2005 с.с. 44 сыл устата терапия отделениетыгар медсиэстэрэлээбит Сивцева Федора Филипповна ыарытыйдар да, кэрэ кэпсээннээх көрүстэ. Кинини кытта  социальнай үлэһит Семенова Лена Егоровнаҕа үлэлиир. «Леналыын хара үлэлиэҕиттэн билсэбит, хайы-үйэ 13 сыл буолла. Биһиги дьиэ кэргэммитигэр чугас, бэйэбит киһибит. Бастаан мин эдьиийбин, тыыл бэтэрээнэ Мария Филипповнаны көрбүтэ. Кэллэҕинэ үөрэ көрсөбүн, наллаан кэпсэтэбит, сонуммутун үллэстэбит. Телефонунан да өрүү сибээстэһэ олоробун. Көмөтө туох да баһаам: бородуукта, эмп ылыыта, коммунальнай төлөбүр кинитэ суох буолбат. Саамай кылаабынайа, кини миэхэ хаһан баҕарар көмөҕө кэлэригэр бүк эрэллээхпин. Кыыспар кытаанах доруобуйаны, ситиһиилэри баҕарабын», — диир бэтэрээн.

Следите за самым важным и интересным в Telegram-канале и WhatsApp-группе ЯСИА