Быйыл ыам ыйын 10 күнүттэн саҕалаан, куйаас уонна тыаллаах күннэр туран, эбиитин сааскы кус көҥүлэ саҕаланан, Ньурба улууһугар айылҕа уокка былдьаныытыгар сүрдээх уустук балаһыанньа буолла. Бу туһунан улуус баһылыгын 1-кы солбуйааччыта Артур Яковлев эттэ, суруйар https://www.instagram.com/gazeta_nyurba_ogni_nyurbu/
«Ыам ыйын 13 күнүттэн саҕалаан улуус үрдүнэн номнуо 11 ойуур баһаара тахсыбыта бэлиэтэннэ, — диир Артур Яковлев. — Билигин 4 баһаар хаалан сытар уонна 2 баһаар төгүрүтүлүннэ. Ньурбачаантан 19 км-даах Көйтөн диэн сиргэ ойуур уота 30 гааны сиэтэ, ол иһигэр 10 гаа ойууру. Ньурбачааннар тахсан үлэлии сылдьан баран, нэһилиэктэрин таһыгар 2 баһаар турбутугар төттөрү киирбиттэрэ. Билигин итиннэ 14 киһилээх «Авиалесохрана» бөлөҕө үлэлиир. Бу күннэргэ Сунтаартан эбии «Авиалесохрана» үлэһиттэрин ыҥырыахпыт. Бүгүн итиннэ сөмөлүөт көтө сырытта. Бу уот мөлтөөн эрэр, ол эрээри син-биир куттала уҕарыйа илик, уот арҕаа өттүгэр барарын тохтотуохтаахпыт».
Кини эппитинэн, иккис баһаар Маартан 9,8 км-даах Атырдьах диэн сиргэ баар. Иэнэ — 30 гаа, итинтэн аҥара — ойуур. Хаҥалас, Маар көҥүл өттүнэн тэриллибит баһаарынай хамаандалара үлэлии сылдьаллар, сүрүн уотун умуруордулар. Кыһыннары итиннэ торф умайа сыппыта, ити ойуур баһаарын төрүөтүнэн буолла. Халлааммыт сөрүүдүйэн биэрэн, иннин ылбыттар. Сөмөлүөтүнэн көтүү оҥоһулунна. Былаан быһыытынан, бүгүн үчүгэйдик быһаарынан-былааннаан баран саба тутуохтаахтар.
Үһүс умулла илик баһаар Октябрьскай нэһилиэгэр Куочайга, Телевышкаттан 5,86 км-даах Ньыла диэн сиргэ баар. Иэнэ — 45 гаа, ол иһигэр 7 гаа — ойуур уонна 38 гаа ходуһа сирэ. Дьиикимдэлэр уонна чаппандалар күүскэ көмөлөһөн улахан уотун умуруоран, билигин ситэри умуруорар үлэлэр бара тураллар. Барыта 24 киһи, ол иһигэр баһаарынай-химическэй ыстаансыйа 11 үлэһитэ уонна олохтоохтортон 13 киһи үлэлиир.
Төрдүс баһаар Араҥастаахтан 4 км-даах Ойбон диэн сиргэ баар, 24 гаа иэннээх, ол иһигэр 16 гаата ойуур. Олохтоохтортон 16 киһи үлэлии сылдьар. Сөмөлүөтүнэн көтөн көрдүлэр, улахан уот суох, төгүрүтэн локализацияҕа ыытарга быһаарда салалта.
