Нуорманы таһынан үлэлээччилэргэ — эбии уоппуска

0
101

Госдумаҕа үлэһиттэр интэриэстэрин көмүскүүр сокуон барыла киирэн сытар. Үлэ чааһын таһынан, нуормата суох үлэлиир дьоҥҥо уоппускаҕа эбии төлөнөр күннэри эбэр туһунан сокуон барылыгар этиллэр.


Докумуон ааптардара (ЛДПР дьокутааттара) хат дьахталларга, ыараханнык ыалдьар дьоҥҥо уонна 18 саастарын туола илик үлэһиттэргэ маннык нуормата суох үлэ күнүн бобору туруорсаллар.

Өскөтүн олохтоммут үлэ күнүн таһынан үлэлээбитиҥ сылга 120 чаастан таһынан таҕыстаҕына, эбии уоппуска күннэрин биэрэр туһунан этии киллэрэллэр. Бу сокуон барыла олоххо киирдэҕинэ, үлэни биэрээччи кэлэктиип үлэҕэ дуогабарыгар саҥа уларыйыыны киллэриэхтээх. Үстэн уон биэс күҥҥэ диэри төлөнөр уоппусканы эбии биэриэхтээх.

“Нуормата суох үлэлиир дьон сороҕор түүннэри-күнүстэри үлэлииллэр, сөпкө сынньаммакка, доруобуйаларыгар охсууну да ылыахтарын сөп. Кинилэр үлэ чааһын таһынан төһөнү үлэлииллэрин ким да аахпат, төлөөбөт. Онон үлэһиттэр бырааптарын уонна интэриэстэрин көмүскүүр туһуттан, бу сокуон барылын оҥордубут. Кырдьык, сокуон быһыытынан, оҥоһуллубут үлэ төлөнүөхтээх”, — диэн дьокутааттар этэллэр.

Билигин Үлэ кодексыгар нуормата суох үлэ диэн өйдөбүлгэ “үлэһиттэр олохтоммут үлэ кэмин таһынан, наада буоллаҕына, кэмиттэн-кэмигэр үлэлиир ураты эрэсиимнэрэ” диэн суруллбут. Бу үлэ “сверхурочнай” диэн өйдөбүлгэ киирсибэт уонна төлөммөт.

edersaas.ru

0
0

Хоруй суох

Хоруйдаа