Булуҥ улууһугар кулун тутар 26 күнүгэр “Норуоттар икки ардыларынааҕы Арктика оскуолата” үлэлии кэллэ. Кинилэр нэдиэлэ устата дьоммут-сэргэбит олохторун, норуот үгэһин кытта билсиэхтэрэ. Былаан быһыытынан, Оскуола 2019 сыллаахха биһиги өрөспүүбүлүкэбит киин куоратыгар арыллара күүтүллэр.
“Арктика оскуолатын сыалынан-соругунан хоту улуустарга үөрэх хайдах барарын көрүү, билии буолар”, – диэн улуус үөрэҕириитин салаатын салайааччыта Матрена Варламова этэр. Ону таһынан, инникитин хоту дойду олохтоохторо бэйэлэрин олохторун хайдах көрөллөрүн билсиэхтэрэ.
“Биһиги биир сүрүн кыһалҕабыт интернет ситимэ буолар. Маннык ыйытык биһиэхэ эрэ буолбакка, элбэх улууска сытыытык турар. Оҕолор туох да кыһалҕаны көрсүбэккэ бэйэлэригэр туһалаах иһитиннэриилэри ыла олороллоругар бу оскуола бэйэтин көмөтүн ууруо. Ол курдук, ханнык баҕарар салааҕа наадалааҕын оҕо бэйэтэ булан билиэхтээх, онон сайдыахтаах.
Биһиги билигин үчүгэй өрүттэрбитин уонна салгыы сайдыахпытын баҕарарбытын, ону таһынан, атын хотугу норуоттары кытта биир сыаллаах, санаалаах сылдьарбытын көрдөрүөхтээхпит.
Үйэлэр тухары илдьэ сылдьыбыт дьарыкпытын көрүөхтэрэ. Ол курдук, Быыкап Мыыска оҕолор хайдах балыгы өрүстэн таһааран, хайдах ас оҥороллорун көрдөрүөхтэрэ. Манан кинилэр ыарахан быһыыга-майгыга түбэстэхтэринэ, номнуо бэйэлэрэ ас булунар кыахтаахтарын дакаастыахтара. Салгыы нэһилиэнньэ өбүгэтин суолун, үгэһин умнууга хаалларбакка, таба иитиитин салаатын илдьэ сылдьарын көрдөрүөхпүт”, – диэн Матрена Дементьевна билиһиннэрэр.
Аны туран, кыра омуктар тыллара сүтэр, симэлийэр куттала өрөспүүбүлүкэ үрдүнэн турар. Билигин төрүт тылы үөрэтиини үөрэҕирии министиэристибэтэ өрө көтөхпүтүн Булуҥнааҕы үөрэҕирии салаатын салайааччыта этэр. Онон эбээн, эбэҥки диэн ааттанар нэһилиэктэр, бэйэлэрин төрүт тылларын билэллэрэ ирдэниэ.
Ону таһынан, таба, балык эрэ үлэтин көрдөрбөккө, таҥас тигэр маастардар тигиинэн дьарыктаналларын эмиэ билиһиннэриэхтэрэ. Холобура, билиҥҥи үйэ дьахталлара тириинэн таҥас тигиитин умна быһыытыйан эрэллэрэ көстөр. Ону сөргүтэргэ, дьоммутун тымныыттан харыстыырга, төрүт дьарыгы хаһаайка өйүгэр-санаатыгар иҥэрэргэ үлэлэр баралларын уонна бара туралларын салайааччы этэр. Аныгы үйэ таҥаһа илийдэҕинэ хам тоҥон хааларын табаһыттар бэлиэтииллэр эбит. Ол курдук кинилэр, тирииттэн тигиллибит таҥас тоҥмотун, сылааһы өр тутарын ыйаллар. Элбэх эр дьон дьахтар тирииттэн тикпит таҥаһын ордорорун биллэрбит.
Улуус баһылыгын бастакы солбуйааччыта Денис Быдыгыев: “Улууспутугар уон биэс киһилээх бөлөх кэллэ. Ол иһигэр Корея Полярнай чинчийэр институтун салаатын салайааччыта Ким Хю Сан. Кинилэр бэйэлэрин бырайыактарын туһунан билиһиннэриэхтэрэ, кэпсиэхтэрэ. Бөлөх кулун тутар 26-30 күннэригэр үлэлиэ, билсиэ-көрсүө. Бу күннэргэ биһиги бэйэбит олохпутун көрдөрүөхпүт. Кулун тутар 27 күнүгэр Хара-Уулаах нэһилиэгэр тахсыахпыт. Онно кыра табаһыттар сүлүөттэрэ буолуо. Онтон кулун тутар 28 күнүгэр Быыкапка балык учаастагар тахсарбыт күүтүллэр. Нэдиэлэ устата араас семинардар, лекциялар ааһыахтара, икки өттүттэн уопут атастаһыахтара”.