Өрөспүүбүлүкэ баһылыгын уонна бырабыыталыстыбатын дьаһалтатын салайааччыта Афанасий Владимиров бэс ыйын 1 күнүгэр видеоконференциянан Мэҥэ Хаҥалас уонна Нам улуустарын уонна нэһилиэктэрин баһылыктарын кытта мунньахтаата. Коронавирус тарҕаныытын тула кэпсэттилэр. COVID-19 кытта охсуһууга суһал штаб салайааччытын солбуйааччы, Саха сирин вице-премьера Ольга Балабкина кытынна.
Саха сиригэр коронавирус тарҕаныаҕыттан 2042 бигэргэммит түбэлтэ таҕыста. Ол иһигэр ааспыт сууккаҕа 112 саҥа ыалдьыбыт дьон баар: Дьокуускайга — 95, Алдан оройуонугар — 8, Хаҥалас улууһугар — 3, Мииринэй оройуонугар — 2, Таатта, Нерюнгри, Чурапчы, Мэҥэ-Хаҥалас улуустарыгар — биирдии. 1134 киһи эмтэниини ааһар.
Мэҥэ-Хаҥалас улууһун баһылыга Николай Старостин иһитиннэрбитинэн, инфекция улуус 10 нэһилиэнньэлээх пуунугар 31 киһиэхэ бигэргэммит. Үгүс түбэлтэ Дьокуускайтан улууска ыалдьыбыт дьон кэлиитин кытта сибээстээх. Майаҕа киирэр суолга пост арылынна. Киирии-тахсыы хонтуруолланар. Суһал штаб уонна полиция бэрэстэбиитэллэрэ уу суолунан айаны тэрийээччилэр хааччахтыыр миэрэлэри төһө тутуһалларын бэрэбиэркэлээтилэр.
Нам улууһун баһылыга Юрий Слепцов эппитинэн, бүгүн улууска 78 ыарыһах баар. Инфекция тарҕаммыт сирдэрин барытын тута дезинфекциялыыллар, ыалдьыбыт киһини кытта алтыспыттары тута булаллар. Субуотаҕа уонна баскыһыанньаҕа атыы кииннэригэр, уопсастыбаннай миэстэлэргэ дезинфекция оҥоһулунна, 52 туонна дизсириэстибэ туттулунна.
