34 саастаах, Ньурба улууһун Маар оскуолатын учууталыгар, нэһилиэк сэбиэтин дьокутаатыгар оҕону кырбааһын иһин холуобунай дьыала тэрилиннэ.
Быһылааны сыныйан үөрэтии кэнниттэн быһаарбыттарынан, былырыын ыам ыйын 27 күнүттэн 31 күнүгэр диэри Ньурба улууһун Чаппанда нэһилиэгэр баар «Салтаны» диэн сиргэ 10 кылаас үөрэнээччилэригэр байыаннай хомуур ыытыллыбыт. Оҕолор маннык тэрээһиҥҥэ байыаннай сулууспаны кытта ыкса билсэллэр.
Буруйданааччы бу хомуурга Маар орто оскуолатын бэрэстэбиитэлин быһыытынан сылдьыбыт.
Ыам ыйын 31 күнэ үүнэр түүнүгэр бу киһи итирэн баран «Сарыал» лааҕырга баар сокуоннай саастарын ситэ илик оҕолорго тиийэн кинилэргэ сэнэбиллээх сыһыанын аһаҕастык көрдөрбүт, ону аһара баран биир оҕону искэ охсуолаабыт.
Силиэдэбэтэллэр быһаарбыттарынан, Маар оскуолатын бэрэстэбиитэлэ бэйэтэ аармыйа кэккэтигэр сулууспалаабатах эрээри, оҕолорго дьиҥнээх аармыйа хайдаҕын өйдөтө, биллэрэ сатаабыт.
Кини буруйун толору билиммит.
Холуобунай дьыала суукка бэриллибитин туһунан Силистийэлиир управление салайааччытын көмөлөһөөччүтэ Надежда Дворецкая эттэ.
