Нам улууһугар сири оҥоруу 210 сылын бэлиэтээтилэр. Никольскай нэһилиэгэр И.С. Шарапов аатынан Сир музейын үлэһиттэрэ көҕүлээтилэр. Бу күн элбэх киһи төрүттэрин историяларын кытта алтыста.
Нам сиригэр-уотугар сир үлэтигэр көмүс көлөһүннэрин тохпут ветераннары, кэлбит ыалдьыттары музей директора Прасковья Протопопова экскурсиялатта. Манна тыыннаах дьон экспонат буолулар. Музей туһунан кэпсээтэҕин ахсын туттан-хаптан көрдөрөн иһэллэрэ үгүс интэриэһи тарта.
Прасковья Протопопова санаатын маннык үллэстэр: «Сири туһаныы музейбытыгар олус үөрүүлээх тэрээһин буолла. 210 сыл анараа өттүгэр Нам улууһугар бурдугу ыһыы саҕаламмытын бэлиэтээтибит. Быйылгы тэрээһиммитигэр сир үлэтигэр эҥкилэ суох үлэлээбит бочуоттаах ветераннарбытын, механизатордарбытын, трактористарбытын ыҥырдыбыт. Маннык интерактивнай быыстапканы бастакыбытын тэрийдибит. Уопсайынан биһиги музейбыт үлэни уонна үлэһит дьону өрө тутар, ол туһунан көлүөнэттэн көлүөнэҕэ кэпсиир сыаллаах-соруктаах. Онон бүгүн үлэни өссө төгүл уруйдуур күммүт үүммүтүнэн бары үөрэ муһуннубут».
XVII үйэ бастакы аҥарыгар Саха сиригэр нуучча бастакы айанньыттара кэлитэлээбиттэрэ. Өбүгэлэрбит кинилэртэн элбэххэ үөрэммиттэрэ, араас малынан-салынан, сэбинэн-сэбиргэлинэн туттар буолбуттара. Нууччалар кэлиэхтэрин иннинэ сахалар бурдук ас баарын билбэт да этилэрэ. Кинилэри көрөн, сири оҥорууга, таҥастааһыҥҥа үөрэммиттэрэ.
Оттон Нам улууһугар сири таҥастаан бурдугу ыһыы Егор Кычкин аатын кытта ыкса сибээстээх. Кини Намҥа кэлэн сыһыаннаах дьону булан, сир үлэтинэн дьарыктанар баҕатын эппит. Улуус кулубата Жирков Хамаҕатта буолаһын кинээһэ Василий Мальцевы уонна I Хомустаах буолаһын кинээһин Петр Самсоновы ыҥыртаан ылбыт. Туһаныллыбакка сытар сиртэн 100 дэһээтинэ сирин быһан биэрэллэригэр дьаһайбыт. Уобалас салалтата 1827 с. бурдук үүннэрээччилэр бөһүөлэктэрин «Никольскай слободаны» тэрийэргэ дьаһал таһаарбыт.
Онон сир үлэтигэр олохторун анаабыт бастыҥ үлэһиттэр ааттарын үйэтитэн Сир музейын аттыгар «Үс сэргэҕэ» кыһыл көмүс буукубанан суруллубут стеланы аһыы үөрүүлээхтик ааста.
Улуус депутаттарын сэбиэтин председателэ Иван Попов, Никольскай нэһилиэк баһылыга Алексей Кривогорницын, улуустааҕы тыа хаһаайыстыбатын управлениетын начальнига Владимир Макаров, улуустааҕы ветеран сэбиэтин председателэ Софья Кобякова эҕэрдэ тылларын эттилэр. Иван Попов уонна Алексей Кривогорницын өр сылларга сир астааһыныгар дьаныардаахтык үлэлээбит ветераннарга махтал суруктары, түөскэ кэтиллэр бэлиэлэри туттардылар.
Ааптар: Анна Созонова, Нам улууһа
