Бу ый саҕаланыыта, о.э. бэс ыйын 2-5 күннэригэр, Хорватия Фажана куоратыгар Саха сирин тустууктара Владислав Левчиков (Кэбээйи), Игорь Софронеев (Нам), Денис Сивцев (Хаҥалас) уонна Гаврил Слепцов (Нам) кумахха тустууга Аан дойду чемпионатыгар кыттан дойдубут чиэһин эрэллээхтик көмүскээн, хамаанданан үһүс миэстэ буолары ситиһэн кэллилэр.
Күрэххэ уопсайа 17 араас дойдулартан кэлэн кыттыбыттар. Тыҥааһыннаах киирсии кэнниттэн Владислав Левчиков чемпион аатын сүгэн, Игорь Софронеев үрүҥ көмүс, Гаврил Слепцов уонна Денис Сивцев боруонса мэтээллэри түөстэригэр иилинэн дойдуларыгар үөрүү көтөллөөх үктэннилэр. Делегацияны хапсаҕайга спорт маастара Платон Саввинов салайан илдьэ сырытта.
Намҥа ыытыллыбыт пресс-конференцияҕа биир дойдулаахтарбытын спорт управлениетын начальнига Павел Иванов, «Нам улууһа» МТ баһылыгын солбуйааччы Ефим Гоголев истиҥник эҕэрдэлээтилэр.
Уолаттар санааларын үллэстибиттэриттэн иһиттэххэ, чемпионакка бэйэлэрэ бэлэмнэммиттэр. Бэлэмнэнэллэригэр усулуобуйа соччо суох буолан, стадиоҥҥа сүүрэн, манежка баар кыракый кумахха дьарыктаммыттар. Атын дойду хамаандалара олуһун бэлэмнэнэн кэлбиттэр. Ити күрэххэ анаан оннооҕор сүүмэрдиир күрэхтэһиини ыыталлар эбит. Саамай күүстээх хамаандалар — иранецтар, гректэр, туроктар уонна норвежецтар.
