«Куттала суох, хаачыстыбалаах массыына суола» национальнай бырайыагынан Дьокуускай – Нам хайысханан улахан үлэ ыытыллар. Суол хаачыстыбатын тупсарыы бу иннинэ быстах өрөмүөнүнэн муҥурданара.


Бу күҥҥэ республикатааҕы суол-иис управлениета Нам кыраныыссатыттан 5 биэрэстэлээх сиргэ урукку асфальт суолу көтүрэн, саҥалыы уура сылдьар. Сүрүн үлэни бэдэрээччит “Инвестдорстрой” толорор. Улахан кыамталаах техникалар асфальт хара маассатын чиҥник кутан бастакы кэрчиктэр кутуллубуттар.

Суол-иис оҥоһуутун кэмигэр сырыы тохтообот. Манна куттал суох буолуутун хааччыйарга, итиэннэ айан хааччахтамматын туһугар бары ирдэбил тутуһуллар. Суоппардар айанныыр тэтимнэрин кыччаталларыгар анал бэлиэлэр тураллар.

Үлэ ГИБДД аттынааҕы учаастактан Хатыҥ Арыы Молодежнай кыбаарталын сапыраапкатыгар диэри уопсайа 8 км 550 миэтэрэлээх сиргэ оҥоһуллуоҕа.

Өссө биир сүрүн үлэнэн Нам сэлиэнньэтигэр икки уулуссаҕа өрөмүөн ыытыллар. Ол курдук, биллиилээх государственнай уонна политическай деятель Илья Егорович Винокуров 125 үбүлүөйдээх сылын көрсө кини аатын сүгэр уулуссата тупсарыллар. Билиҥҥитэ кумаҕы толору тиэммит массыыналар хотоҕостуу субуллаллар. Маны сэргэ Нина Корякина аатынан уулусса быйыл ситэриллэн асфалынан бүрүйүөхтэрэ. Суол-иис сайдыытын үлэтэ республика хааһынатыттан уонна улуус бюджетыттан үбүлэннэ.

Былырыын Бөтүҥҥэ диэри оҥоһуллубут суол ситэриллэн, салгыы 18,5 км сиргэ асфальт тэлгэниэ. Итини тэҥэ Кэҥкэмэ үрэҕин муостата оҥоһуллара былааннанар.

Төһө да уустук кэм тирээн турдар, үлэни толорооччулар хаачыстыбалаах өрөмүөн сыл бүтүүтэ түмүктэниэҕэ диэн эрэннэрэллэр, диэн СИА-ҕа иһитиннэрдэ Анна Созонова, «Нам улууһа» МТ пресс-сулууспата.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.