Нам улууһун II Хомустаах орто оскуолатын 9-с кылааһын үөрэнээччитэ Саина Осипова соботтон чипсыта Саха сирин аар-саарга аатырта. Кини балаҕан ыйын 22-28 кк. Холбоһуктаах Арабскай Эмираттар Абу-Даби куоратыгар ыытыллыбыт аан дойдутааҕы «ЭКСПО-НАУКА» быыстапка-дьаарбаҥкаҕа ситиһиилээхтик кыттан кэллэ.
II Хомустаах орто оскуолатын учуутала Александра Романовна Слепцова 2018 сыллаахха «Тоото утума» диэн бөлөх тэрийэн, бииргэ төрөөбүт Саша, Саина, Софья Осиповтары дьарыктаабыт. Оҕолор сэрии сылларыгар балыктаан үгүс киһини хоргуйууттан быыһаабыт эһэлэрэ Замятин Яков Семенович аатын үйэтитэр кэскиллээх үлэлэрэ саҕаламмыт. Бастаан эдэр чинчийээччилэр соботтон чипсы оҥорорго холоммуттар. Оскуола иһинээҕи конференцияҕа, улуустааҕы «Начинающий фермер» конкурска 1-кы миэстэлэри ылбыттар. 2018 сыл олунньутугар агрооскуолалар икки ардыларынааҕы «Начинающий фермер» өй-санаа оонньуутугар «Самый креативный проект» диэн анал аакка тиксэн, үөрүүлэрэ өссө үксээбит.
2018 сыл кулун тутарыгар Софья Осипова Бүтүн Россиятааҕы «Шаг в будущее» ыччат научнай форумугар «Производство экологически чистого продукта «Собо-чипс» из речного карася» дакылаатынан 3-с степеннээх дипломант үрдүк аатын ылан, Холбоһуктаах Арабскай Эмираттарга ыытыллар аан дойдутааҕы быыстапкаҕа кыттарга мэктиэлэммит.
Саина Осипова балаҕан ыйын 22-28 кк. аан дойдутааҕы «ЭКСПО-НАУКА» быыстапка-дьаарбаҥкаҕа кыттан, дипломунан уонна мэтээлинэн бэлиэтэннэ. Бу быыстапкаҕа Россияттан Москваттан, Челябинскайтан, Красноярскайтан, Воронежтан, Мурманскайтан чулууттан чулуулар кыттыбыттар.
Саинаны кытта сибээскэ тахса сырыттыбыт:
— 50 дойдуттан 1500 ыччат кытынна. Икки күн экскурсияҕа сылдьан үгүһү биллибит-көрдүбүт. Бастакы күн мин Marina Mall диэн улахан атыы-эргиэн киинигэр сырыттым. Ас, таҥас арааһа баарыттан олус сөхтүм. Иккис күн Qasr Al Hosn диэн музейга сылдьан Абу-Даби куорат хайдах тутуллубутун, төрүт олохтоохтор дьарыктарын билистим.
Быыстапка 3 күн устата сарсыарда 9 чаастан киэһэ 4 чааска диэри барда. Мин бырайыагым ис хоһоонун көрдөрөр хаартыскалардаах 3 улахан баннеры английскай тылынан бэлэмнээн барбытым.
Кыттааччылар бары английскай тылынан кэпсэтэллэр. Бастаан ыарырҕатан баран, сыыйа үөрэнэн тэҥҥэ кэпсэппитим. Үксүн патеннааххын дуо диэн ыйыталлар. Бырайыакпын олус сэргээтилэр, хайҕаатылар. Сүбэ да биэрдилэр. Английскай тылы күүскэ үөрэтиэххэ наада эбит диэн санаалаах кэллим.
Куорат дьоно-сэргэтэ көрсүө майгылаахтар, сэмэйдэр. Туристарга истиҥник сыһыаннаһаллар. Миигин наар «мисс» дии сырыттылар. Аан бастаан истэргэ хайдах эрэ этэ. «Ити миигин этэллэр дуо?» — диэн толкуйдуур этим.Онтон кэнники үөрэммитим. Бэйэбин улахан киһи курдук санаммытым. Ситиһиибиттэн олус үөрдүм.
Ааптар: А. КОРЯКИНА, http://ulus.media
