29 Кулун тутар 29.03
  • -14°
  • $ 92,26
  • 99,71

Нам Хатырыгар «Отуу уота – дууһам кута» ыытылынна

12:46, 30 сентября 2016
Читайте нас на
Яндекс Новости
ЯДВ

Биллиилээх бэйээт, ССРС Суруйааччыларын уонна Суруналыыстарын сойууһун чилиэнэ Николай Рыкунов төрөөбүтэ 80 сылын көрсө «Отуу уота – дууһам кута» өрөспүүбүлүкэтээҕи I литературнай түһүлгэ ыытылынна.


Түһүлгэ Нам улууһун Хатырык с. Үрдүк Иирэ диэн, кырдьык да, айарга-тутарга, кэрэни хоһуйарга анаммыт айылҕа маанылаабыт үтүөкэннээх сиригэр буолла.

Ыалдьыттары сарсыарда эрдэ култуура уонна духуобунай сайдыы улуустааҕы управлениетын салайааччыта Елена Заровняева, Н.Рыкунов аатынан киин библиотека дириэктэрэ Майя Софронова уонна «Отуу уота» Нам улууһун литературнай түмсүүтүн чилиэннэрэ Эҥсиэли хочотун үөһэттэн көрөр «Үс сэргэ – ытык сир» тохтобулга көрүстүлэр. Манна Чаҕылҕан аатынан литературнай музей сэбиэдиссэйэ Иннокентий Кривошапкин улуус историятын кэпсээтэ. «Отуу уота» түмсүү салайааччыта Александр Дунаев биир дойдулааҕа Н.Рыкунов хоһоонун дорҕоонноохтук аахта.

Дьокуускайтан СӨ Суруйааччыларын сойууһун бэрэссэдээтэлэ Иван Мигалкин, бэйээт, П.Ойуунускай аатынан судаарыстыбаннай бириэмийэ лауреата Николай Винокуров-Урсун, «Чолбон» сурунаал кылаабынай эрэдээктэрэ Данил Макеев, бэйээт, техническэй наука доктора Егор Старостин-Байаҕантай, Уус-Алдан улууһуттан «Уһуктуу» айар куттаах кэрэ аҥаардар түмсүүлэрин чилиэннэрэ кытыннылар.

Ыалдьыттар Хатырык с. тиийиэххэ диэри улуус кэрэ-бэлиэ сирдэригэр, уһулуччулаах дьон пааматынньыктарыгар тохтоон, сүгүрүйэн аастылар. Даадарга Николай Рыкунов «Дьахталлар» диэн айымньытынан оҥоһуллубут пааматынньыкка олохтоох түөлбэ, педагогическай колледж устудьуоннарын кытары көрсүһүү буолла. Пааматынньык аттыгар туран, СӨ Суруйааччыларын сойууһун чилиэнэ, колледж преподавателэ Прасковья Байанаева Николай Рыкунов хоһоонун ааҕан эдэр да, эмэн да сүрэҕи долгутта. Илья Винокуров-Чаҕылҕан пааматынньыгар хаартыскаҕа түһүү кэнниттэн салҕыы Бөтүҥҥэ Ефрем Сивцев-Таллан Бүрэ музейыгар экскурсия буолла, суруйааччылар бэйэлэрин кинигэлэрин бэлэх ууннулар. Онтон Хатырык с. М.К.Аммосов аатынан судаарыстыбаннас музейыгар экскурсия ыытылынна.

х х

Салгыы күһүҥҥү айылҕаҕа куустаран, Үрдүк Иирэ диэн этнографическай комплекска тиийдибит. Манна өбүгэлэрбит олорон ааспыт историяларын кэрэһилиир остуруоктар тутуллубуттарын, сүдү улахан тутуу барбытын сөҕө-махтайа, биһирии көрдүбүт. Ыалдьыттары түһэрии, комплексы көрдөрүү кэнниттэн «Отуу уота – дууһам кута» литературнай түһүлгэ үөрүүлээхтик аһылынна.

Литературнай түһүлгэни Хатырык с. баһылыга Алексей Пинигин бэйэтэ алгыстаан арыйбыта соһуннук көһүннэ. Улуус баһылыга Александр Атласов, Улуус мунньаҕын бэрэссэдээтэлэ Иван Петров уо.д.а. поэзияны олох аҥара оҥостубут айар дьону эҕэрдэлээтилэр.

Николай Михайловичтыын бииргэ үөрэммит, Уус Алдан Өнөрүттэн кэлбит бэйээт Николай Литвинцев доҕорун истиҥник-иһирэхтик аҕынна.

Н.Рыкунов огдообото Евдокия Ивановна: «Саамай элбэх кириитичэскэй ыстатыйалары суруйбут, кини айымньыларын бүтүн норуокка өйдөппүт, ырыппыт киһинэн эн буолаҕын. Эйиэхэ Нам дьонун ортотугар улахан махталбын тириэрдэбин», – диэн туран, Николай Винокуров-Урсуҥҥа бар дьонун ортотугар махтанна. Онтон Урсун сотору кэминэн бэйээт туһунан өссө биир кинигэ бэчээккэ тахсарын туһунан сонуну иһитиннэрэн, биир дойдулаахтары астыннарда.

Отуу тула түптэ буруота унаарыыта, саха балаҕаннарыгар арыылаах алаадьы сырылаччы буһуута Николай Рыкунов айбыт хоһооннорун уус-ураннык ааҕыыга «Ходуһа ырыаһыта» литературнай күрэх саҕаланна.

Иккис күҥҥэ Максим Аммосов төрөөбүт Аччыгый Арыытыгар Рыкунов хоһооннорун строкаларын ситэрэн тута айыыга күрэх ыытылынна. Икки күннээх литературнай күрэх мүөттээх үөттэр, кэбиһиилээх оттор тастарыгар ыытыллыбыта Николай Рыкунов уран, нарын тыллаах-өстөөх, айылҕа кутун-сүрүн олус таба биэрэр бэйээт буоларын өссө төгүл туоһууларга дылы буоллулар.

Түмүккэ Аччыгый Арыыга отуу уотугар омурҕаҥҥа оллоонноон олорон түмүктэри ырытыстылар. Сэһэн-сэппэн түптэ унаар буруотун кытта ыраахха диэри иһилиннэ.

Следите за самым важным и интересным в Telegram-канале и WhatsApp-группе ЯСИА