Балаҕан ыйын 15 күнүгэр Нам улууһун Хатыҥ Арыы нэһилиэгин Аппаанытыгар «Тыа сирин бигэ туруктаахтык сайыннарыы» диэн федеральнай программа чэрчитинэн «Озернай» квартал силигин ситэн үөрүүлээх быһыыга-майгыга аһылынна.


Бу тус сыаллаах федеральнай программанан 455 учаастак түҥэтиллэн саҥа дьиэлэр дьэндэһэн көрүөхтэн үчүгэй квартал буолан эрэр. «Озернайга» уот, күөх төлөн ситимэ тардыллан, инженернэй инфраструктура толору оҥоһулунна. Билигин саҥа сир хаһаайыттара күргүөмнээхтик алаһа дьиэлэрин туттан киирэллэрэ эрэ хаалла. Үөрүүлээх түгэни бэлиэтиир тэрээһиҥҥэ Россия Государственнай Думатын депутатыгар кандидат Юрий Куприянов, Ил Түмэн Государственнай тутууга уонна сокуоннаска сис кэмитиэт председателэ Алексей Еремеев, «Нам улууһа» МТ баһылыга Александр Атласов, СӨ гражданскай обществотын институттарын сайыннарыы миниистирэ, «Ленскэй нэһилиэк» МТ кураатара Сардана Гурьева, СӨ тыатын хаһаайыстыбатын уонна ас-үөл бэлиитикэтин миниистирин солбуйааччы Семен Потапов, «Хатыҥ Арыы нэһилиэгэ» МТ баһылыга Юрий Слепцов, «СУ-77» ХЭТ генеральнай директора Петр Бурнашов уо.д.а. кыттыыны ыллылар.

Кварталы үөрүүлээхтик аһыы кэнниттэн, «Россия дьиэ кэргэнин дьиэнэн хааччыйыы» программа чэрчитинэн Татьяна Эверстова толору хааччыллыылаах туттубут дьиэтин көрдүлэр иһиттилэр.

Үрдүк сололоохтор, квартал Россия үрдүнэн саамай улахан эбийиэк буоларын бэлиэтээтилэр. Ол курдук, Россия Государственнай Думатын депутатыгар кандидат Юрий Куприянов: «Хатыҥ Арыы, Нам улууһун олохтоохторун уонна быһаччы үлэлэспит дьону республикаҕа улахан суолталаах, тыа сиригэр дьону олохсутар сыалтан үгүс сыралаах үлэни ыытан «Озернай» каварталы оҥорон аспыттарынан эҕэрдэлиибин. Манна 455 ыал дьиэ-уот туттан, тэлгэһэ тэринэн ньир бааччы олорон үлэлиэхтэрэ-хамсыахтара. Үлэ ыытылларыгар федеральнай, өрөспүүбүлүкэтээҕи бюджеттан үп көрүллэн асфальт суолланна, уот, уу ситимэ тардылынна. Бу норуот, тыа сирэ, нэһилиэк улуус, республика быһыытынан сайдыыга биир улахан хардыы буолар. Инникитин маны холобур оҥостон атын улуустарга, оройуоннарга бу курдук кварталлар баар буолуохтара. Сыллата үөрэхтэрин саҥа бүтэрэн тыа сиригэр үлэлии барар специалистар олохсуйан үлэлииллэригэр улахан олук буолуоҕа. «Озернай» квартал аһыллыбыта нэһилиэккэ, улууска, республикаҕа саҥа историяны түстээтэ», — диэн санаатын үллэһиннэ.

2
0
comments powered by HyperComments