Намҥа “Ылдьаа ыччаттара” түмсүү РФ Президенын гранынан оҥорбут бырайыагын түмүктээтэ

И.Е. Винокуров аатынан Хатыҥ Арыы орто оскуолатыгар «patriotsakha.ru» байыаннай-патриотическай сайт уонна «Голоса далекой войны» документальнай киинэ сүрэхтэниилэрэ буолла. Бу киинэни уонна сайты Хатыҥ Арыытааҕы Мотрена Егоровна Винокурова салайааччылаах «Ылдьаа ыччаттара» уопсастыбаннай тэриллии «Увековечение памяти воинов-якутян, освободителей Крыма 1944 года» бырайыак чэрчитинэн оҥордо. Ааспыт сылга «Ылдьаа ыччаттара» РФ Президенин граныгар ити бырайыактарынан «Сохранение исторической памяти» диэн хайысхаҕа кыттаннар кыайыылаах үрдүк аатын ылбыттара. 


Ыччаттар бэс ыйыгар Крымҥа уоттаах сэрии ааспыт толоонугар тиийэннэр сүрэхтэринэн ылынан, илэ харахтарынан көрөн элбэх үлэни, үйэтитиини оҥорон кэлбиттэрэ. Киинэни Крымы босхолооһуҥҥа сэриилэспит Саха сирин буойуттарын ахтыыларыгар олоҕуран устубуттар, элбэх архыып матырыйааллара киирбиттэр, байыаннай историктартан интервью ылбыттар.

Бу киинэни оҥорууга, устууга режиссёр быһыытынан Саймон Прокопьевич Сергеев улахан күүс-көмө буолбут. Документальнай киинэ 33 мүнүүтэлээх, онон олус элбэх кадр сатаан киирбэтэҕин эттилэр. Киинэ аныгы ыччакка өйдөнүмтүө буолбут.

Бырайыак чэрчитинэн байыаннай-патриотическай сайт оҥоһуллубут. «Ылдьаалар»  ону туһааннаах түмсүүгэ биэриэхтэрин баҕараллар, бэйэлэрэ эмиэ кини сайдыытыгар  үлэлэһэр санаалаахтар.

Тэрээһиҥҥэ «Нам улууһа» МТ баһылыга Юрий Слепцов, улуустааҕы ветераннар Сэбиэттэрин председателэ Михаил Баишев, «Хатыҥ Арыы нэһилиэгэ» МТ баһылыгын солбуйааччы Иван Ноговицын, оскуола кэлэктиибэ, улуус оскуолаларын үөрэнээччилэрэ кыттыыны ыллылар. Киинэни устууга ыччаттар сыралаах үлэлэрин бэлиэтээтилэр, салайааччыларга, режиссёрга махтал суруктары туттардылар. Манна мустубут улуус оскуолаларын үөрэнээччилэрэ бөлөхтөрүнэн арахсан патриотическай хайысхаҕа анаан араас барыйыактары оҥорон иһитиннэрдилэр.

«Ылдьаа ыччаттара» бырайыактарын салгыы өссө сайыннарар санаалаахтар. Кинилэр улуус атын түмсүүлэрэ патриотическай иитиигэ киэҥ хабааннаах үлэлэри ыыталларыгар ыҥырдылар.

Ааптар: Семен Аргунов, «Эҥсиэли» хаһыат

This post was published on 30.11.2018 20:35 20:35