Бэс ыйын 15 күнүгэр Нам улууһун Ленскэй нэһилиэгэр 6-с №-дээх «Кыталык» оҕону сайыннарар киинэ «Сахам сирэ XXI-с үйэҕэ» диэн өрөспүүбүлүкэтээҕи бырагыраама чэрчитинэн аныгы үйэ ирдэбилигэр толору эппиэттиир саҥа оҕо саада үлэҕэ киирдэ.
Кэнчээри ыччаппыт сайдар киинэ арыллыбытын бэлиэтиир символическай күлүүһү «Уйгу-2» ХЭТ сүрүннүүр дириэктэрэ Станислав Ядреев оҕо саадын сэбиэдиссэйигэр Туйаара Ядрихинскаяҕа туттарда.
Үөрүүлээх түгэҥҥэ сырдык, ыраас дьыссаат дьиэтин тутуутугар күүс-көмө, өйөбүл буолбут төрөппүттэргэ, үлэһиттэргэ, салайааччыларга, тутааччыларга истиҥ иһирэх тыллаах махтал суруктары туттартаатылар.
«2011 сыллаахха биһиги үлэлээн олорбут дьиэбитин хаарбах туруктааҕынан ааҕан, детсад капитальнай өрөмүөнүгэр, реконструкциятыгар үп туруорсуута, көрдөөһүнэ саҕаламмыта. Онтон 2015 сыллаахха «Үтүө дьыала» бырагырааматыгар киирэн, үп көрүллэн үлэ саҕаламмыта. Бэдэрээччигинэн Станислав Сивович салайааччылаах «Уйгу-2» тэрилтэ үлэлээтэ», — диэн Туйаара Ядрихинская санаатын үллэһиннэ.
Үөрүүлээх тэрээһиҥҥэ СӨ үөрэҕин министрин солбуйааччы Василий Гуляев, «Нам улууһа» МТ баһылыга Александр Атласов, «Ленскэй нэһилиэк» МТ баһылыга Андрей Новгородов кыттыыны ыллылар.
