Орто Халыма Налимскайыгар олохтоох дьаһалта исписэлииһин Юрий Константинович Третьяков көҕүлээһининэн, салалтатынан нэһилиэккэ өтөрүнэн буолбатах улахан субуотунньук ыытылынна. 50 сыл анараа өттүгэр тутуллубут, билигин быраҕыллыбыт муоста билиини быһыттаан сыппыт тимир буочукаларын, сытыйбыт мастарын хостоотулар.


«Халыма долгуннара» хаһыат балаҕан ыйын 11 күнүнээҕи 73-с №-гэр «Нэһилиэк кыһалҕатын быһаарыахха» диэн мин ыстатыйам тахсыбыта. Ыстатыйа тахсаатын кытта улуус баһылыга Евгений Михайлович Слепцов миигин кытта сууллубут муоста туругун көрбүтэ-билбитэ. Ыстатыйа суруллуутун сөптөөҕүнэн аахпыта. Кэлэр сылга дьаһал ыларга сүбэлэһиэх буолбута. Баһылык этиитинэн, маҥнайгы хамсааһына саҕаланна.

Налимскайга бу күннэргэ буолан ааспыт субуотунньукка 40-ча киһи олус көхтөөхтүк кытынна. Мин бу тиэмэни күөдьүппүт киһи быһыытынан, эдэрдэр үлэлэрин көрө сырыттым.

Элбэх киһи, чахчы үлэлииргэ, кыайарга сорунан кэлбитэ өтө көстөр. Хас биирдии киһи ис дууһатыттан үлэлээн, хамсаан, муустаах ууну булкуйан, сытыйбыт мастары, буочукалары хостоон, биэрэккэ бэрээдэктээн ууруу мээнэ үлэ буолбатах. Тиэхиньикэлээх уопуттаах тырахтарыыс Аркадий Иннокентьевич Еремеев, Илья Гаврилович Кутуков бэйэлэрин сатабылларын толору көрдөрдүлэр.

 

Байды нэһилиэгэр Сэбиэскэй былаас саҕана бэрт үлэһит-хараһыт, оройуоҥҥа, өрөспүүбүлүкэҕэ биллэр үтүө дьон үлэлээн-хамсаан, олорон ааспыта, онтон тарҕаммыт нэһилиэк орто саастаах көлүөнэтэ сөптөөхтүк табан көҕүлээтэххэ, киһи мыыммат дьонноохпутун көрөн итэҕэйдим, астынным. Ааспыт үйэ 60-70-с сыллардаахха көхтөөх, ньиргиэрдээх субуотунньуктар төбөбөр элэҥнээн аастылар.

Субуотунньугу салайбыт, үлэлэппит Юрий Константинович Третьяков, эдэр, кыаҕар сылдьар киһи, ылсыбыт дьыалатын тиһэҕэр тиэрдиэ диэн эрэнэбин.

Кэлэр сылга өбүгэлэрбит муосталарын оннугар, саҥаны тутарга нэһилиэгинэн ылсыахха диэн ыҥырабын, сүбэ-ама биэрэргэ кырдьаҕастар куруук бэлэммит.

Биһиги нэһилиэкпит кыһалҕатын ким да тастан кэлэн быһаарыа, көннөрүө суоҕа. Онон эдэрдэргэ туһаайан этэбин: нэһилиэк олоҕо тупсарын туһугар уопсай сүбэнэн үлэлээҥ-хамсааҥ, сомоҕолоһуҥ, эһиэхэ кыах толору баар, суол аһаҕас.

Ааптар: Николай Слепцов, https://ulus.media

0
0
comments powered by HyperComments