Муус устар 29 күнэ Бикипиэдьийэҕэ сурулларынан, Аан дойдуга Үҥкүү күнэ. Бу бырааһынньык 1982 сыллаахтан бэлиэтэнэр, үҥкүү бары истиилигэр ананар. Көҕүлээччилэринэн ЮНЕСКО үҥкүүгэ норуоттар икки ардыларынааҕы сэбиэтэ буолар. Француз балетмейстера, хореография искусствотын реформатора уонна теоретига, историяҕа «аныгы балет аҕата» аатынан биллэр Жан-Жорж Новерр (Jean-Georges Noverre) төрөөбүт күнүн кытта сибээстээх.
🔹1627 — Франция кардинаала Ришельё сорудаҕынан Канааданы чинчийэр уонна олохсутар соруктаах «Сүүс акционер хампаанньата» тэриллибит.
🔹1731 сыллаахха Сенат уурааҕынан Саха уеһын састаабыттан Охуоскай сирдэрэ араарыллыбыттара, туспа Охуоскай салалта (Охотское правление) үөскээбитэ, киинэ Охуоскай остуруокка буолбута. Бу салалтаҕа Лаамы кытылын барытын, Үт сирин, Камчаатканы уонна Курил арыыларын киллэрбиттэрэ.
🔹1770 — Англия хапытаана Джеймс Кук аан бастаан Австралияҕа тиксибит.
🔹1852 — оччотооҕуга эдэр суруйааччы И. С. Тургенев (Муму, Отцы и дети) хаайыыга угуллубут. «Московские ведомости» хаһыакка Н. В. Гоголь өлбүтүгэр ыстатыйа суруйбутун былаастар өрө турууга ыҥырда диэн сыаналаабыттар. Эбэн эттэххэ Иван Сергеевич — дворянин этэ, Арслан Турген (Түргэн Хахай) диэн татаар муурзатын сыдьаана.
🔹1863 — Арассыыйаҕа таһыйыыны хааччахтаабыттар.
🔹1956 сыллаахха Саха АССР Үрдүкү Суута 1928—1929 сылларга Саха АССР Совнаркомун бэрэссэдээтэлэ буола сылдьыбыт, 1932-35 сылларга Дьокуускайы салайбыт Николай Бубякины буруйа суоҕунан реабилитациялаабыта. 1938 сыллаахха репрессияҕа түбэһэн 1942 сыллаахха хаайыыга өлбүт эбит.
🔹1978 — Ойуунускай аатынан Судаарыстыбаннай бириэмийэ «Ханидо уонна Халерха» ааптарыгар Семен Куриловка уонна Ньурбаттан төрүттээх Дьокуускай билиҥҥи киинин сүрүн дьиэлэрин («Лена» гостиница, ЛОРП дьиэтэ, Өксөкүлээх киинэ, АЛРОСА дьиэтэ уо.д.а.) бырайыактаабыт архитекторга Дмитрий Саввиновка анаммыт.
🔹1982 — Кытай нэһилиэнньэтин ахсаана 1 миллиард буолбут. Бу иннинээҕи 30 сыл устата (1950-1980 сс.) Кытай дьонун ахсаана быһа холоон икки төгүл элбээбит. Онтон 1979 сыллаахтан ыла «соҕотох оҕо бэлиитикэтэ» киллэриллэн, дьон элбиирин тэтимэ бытаарбыт.
🔹2002 — СӨ Төрүт сокуонугар уларытыылар киирбиттэр. «Судаарыстыба былааһын олохтоох уорганнара» диэн салаа суох буолбут.
Төрөөбүттэр:
🔸1727 — Жан Жорж Новер (ө. 19.10.1810) — хореография ускуустубатын уларыппыт үҥкүүнү үөрэтээччи, француз балетмейстера. Кинини «аныгы балет аҕата» диэн ааттыыллар. ЮНЕСКО быһаарыытынан 1982 сыллаахтан Ж. Ж. Новер төрөөбүт күнүгэр аан дойду Үҥкүү күнүн бэлиэтиир.
🔸1929 — Юрий Уржумцев (1929—2002), Арассыыйа НА чилиэн-кэрэспэдьиэнэ, 1997—2002 сылларга Саха сиринээҕи Наука киинин Бөрөсүүдьүмүн бэрэстээтэлэ.
🔸1956 — Мэҥэ-Хаҥалас Тараҕай нэһилиэгэр хомусчут Федора Гоголева.
Өлбүттэр:
🔹1980 — Альфред Хичкок (1899 с.т.)
https://sah.wikipedia.org/wiki/Муус_устар_29
https://sah.wikipedia.org/wiki/Саха_сирин_дьаһалталарынан_уонна_сирдэринэн_араарыы_устуоруйата
https://sah.wikipedia.org/wiki/Бубякин_Николай_Васильевич
https://sah.wikipedia.org/wiki/Курилов_Семен_Николаевич
https://sah.wikipedia.org/wiki/Саввинов_Дмитрий_Иванович
