29 Кулун тутар 29.03
  • -15°
  • $ 92,37
  • 99,53

Муоматааҕы дьарыктаах буолуу киинэ олохтоохтору үлэнэн хааччыйар соруктаах

13:35, 10 марта 2018
Текст:
Читайте нас на
Яндекс Новости
ЯДВ

Хайа да дойдуга сайдыы таһыма, олох-дьаһах туруга нэһилиэнньэ дьарыктаах буолуутунан сыаналанар: үлэтэ суох киһи ахсаана төһөнөн аҕыйах – соччонон олох таһыма үрдүк. Муома улууһугар нэһилиэнньэ дьарыктаах буолуутугар тэрээһиннээх үлэ ыытыллар.


2018 сыл Саха Өрөспүүбүлэкэтигэр Дьарыктаах буолуу сылынан биллэриллэн, нэһилиэнньэ олоҕун тупсарар сорук туруорулунна. Муома улууһугар Нэһилиэнньэ дьарыктаах буолуутун киинин салайааччы Сардаана Архипова сыл устата туох үлэ былааннанарын туһунан маннык кэпсиир:

Быйыл дьарыктаах буолууну тэрийиигэ болҕомто ууруллан, 32 тыһ. киһини үлэнэн хабар, промышленнай оройуоннарга үлэтэ суох буолууну 7 %-ынан, тыа улуустарыгар 9 %-ынан аччатар сорук турда. Промышленноска олохтоох дьон үлэлиирин тэрийиигэ, улуустарга уопсастыбаннай үлэлэри кэҥэтэргэ, ыччаты итиэннэ доруобуйаларыгар хааччахтаах дьону үлэнэн хааччыйарга улахан үлэ ыытыллыахтаах. Оттон бэйэҕэ кэллэххэ, биһиги 2017 с. үлэбит былаанын толорбуппут. Үс үлэтэ суох киһи биирдэм дьыала арынарыгар (Сааһыырга такси өҥөтүнэн, Хонууга оҕуруот аһын үүннэриинэн уонна парикмахер өҥөтүнэн дьарыктаналларыгар) 316 тыһ. солк. өйөбүл оҥоһуллубута. Уопсастыбаннай үлэни тэрийиигэ былаан быһыытынан, биир ыйга биир киһи үлэнэн хабыллыбыта, саастарын ситэ илик оҕолору үлэнэн хааччыйыынан 60 оҕо оҕуруокка, өрөмүөҥҥэ, суолу оҥорууга, табаны иитиигэ, 30 киһи эргэ дьиэлэри көтүрүүгэ, оттооһуҥҥа, тротуардары оҥорууга үлэлээбиттэрэ, икки киһи кууруска үөрэммитэ, идэҕэ туһайыы үлэтигэр 50 киһи хабыллыбыта. Быйыл бу үлэбитин салгыахпыт. Дьарыктаах буолуу сылын үөрүүлээхтик арыйыы сиэрин-туомун олунньу 3 күнүгэр «Осикат» этно-култуура киинигэр тэрийбиппит.

Сэһэргэһээччим этэринэн, билиҥҥи туругунан Муома улууһун үрдүнэн 114 үлэтэ суох киһи баар, кинилэртэн 81-рэ босуобуйа ылар. Кулун тутарга нэһилиэктэринэн сылдьан, үлэтэ суохтары кытта көрсөн, промышленность уонна тыа сирин уопсастыбаннай үлэлэргэ көҕүлүөхтээхтэр. Билигин үлэтэ суох дьон испииһэгин бэрээдэктии, аҥкыата ыытан дьон туох үлэҕэ талаһарын быһаара сылдьаллар. Анал сыл чэрчитинэн сөптөөх үп көрүллэн, үлэтэ суох дьону үлэнэн хааччыйан, үөрэҕэ суоҕу үөрэхтээн, сылы үчүгэйдик түмүктүүргэ эрэллээхтэр.

Следите за самым важным и интересным в Telegram-канале и WhatsApp-группе ЯСИА
Тутаах тыллар