Муома ыччата Ил Дархан туһаайыы суругун өйүүр

Сыл түмүктэнээри турдаҕына Саха Өрөспүүбүлүкэтин Баһылыга Айсен Николаев аан бастаан Ил Түмэҥҥэ туһаайан Саха сирин инники кэскилин түстээһиҥҥэ анаан ыҥырыы оҥордо.  Хоту оройуоннартан сылдьар устудьуоннар ордук Арктика сайдыытын түстүүр анал министерство тэриллэрин туһунан үөрэ иһиттилэр. «Ил Дархан дьиҥ сөптөөхтүк хоту дойду кыһалҕатын көрбүт, ылыммыт», — диир Муома ыччата. 


Ил Дархан Туһаайыытын Муома ыччата биһирээтэ. Кырдьык да, кэнники кэмҥэ хоту сиргэ, ордук көмүс-алмаас хостоммот оройуоннарыгар олох-дьаһах таҥнары түһүүтэ мэлдьэҕэ суох. Бастатан туран, сүрүн салаа – таба иитиитин көрдөрүүтэ сылын ахсын намтыы турар. Төһө да табаһыт хамнаһа көрөр табаларын ахсаанынан бэриллэ турарын үрдүнэн ыарахан идэ кыһалҕатын ырааҕынан саппат. Анал тээбириннэринэн, үлэ таҥаһынан хааччыллыы билиҥҥи ирдэбилгэ эппиэттээбэт.

Ити да иһин кэнники кэмҥэ таба иитиитигэр үлэлии барар баҕалаах ыччат суоҕун тэҥэ. Уопсайынан хоту сиргэ ыччат олохсуйуутун боппуруоһа ыараханнык быһаарыллар. Киин сиргэ үөрэммит ыччат ыраах хоту үлэлии барара бэрт элбэх биричиинэттэн тутулуктанар. Бастатан туран, олорор дьиэ усулуобуйата киин сиртэн итэҕэс буолуо суохтаах. Маһынан оттуллар дьиэҕэ олорор эдэр дьоҥҥо, ордук кыргыттарга сүрдээх ыарахаттардаах.

Быйыл Муома оройуонуттан 20-тэн тахса устудьуон Хотугулуу-илиҥҥи федеральнай университеты бүтэрээри сылдьар. Баһыйар үксэ учуутал идэлээхтэр. Кинилэртэн дойдуларыгар бэрт ахсааннаах киһи төннөр санаалаах. Үксүлэрэ үөрэхтэрин салҕаан магистратураҕа туттарсар баҕалаахтар. Эбиитин быйылгыттан хоту сиргэ үлэлии барар исписэлиис урукку курдук квартира ылыытыгар министерствоны кытта хос үбүлээһин дуогабара түһэрсиллибэт буолбута үгүс ыччаты атахтыан сөп. Онон ыччат хоту сиргэ төннүүтүн боппуруоһа Арктика сайдыытыгар сүрүн тутул буоларын өйдүөххэ, кыһалҕаны бүттүүн быһаарыахха. Билигин Дьокууускай куорат үөрэхтэрин кыһаларыгар уопсайга миэстэ булуу олус сытыытык турар. Урукку курдук хоту дойду буоллуҥ да уопсайга миэстэ биэрбэттэр.

Күһүн аайы үөрэххэ киирбит устудьуоннардаах төрөппүттэр оҕолоругар олорор сир булууга олус эрэйи көрөллөр. Тоҕо эрэ хоту сир дьоно наһаа кыахтаах, элбэх харчылаах курдук сыыһа өйдөбүл баар. Онон баай дьон дьиэ куортамнаан оҕолорун үөрэттэриэхтэрин сөп курдук саныыллар. Аны каникул кэмигэр хотуттан сылдьар ыччат айан суолун ороскуотун кыайан дьонноро уйуттубат буоланнар, куоракка хаалаллара үгүс. Бу кэмҥэ уопсайга хаалар көҥүллэммэт буолан, дьиэ куортамныырга күһэллэллэр. Урукку сылларга аҕыйах ахсааннах норуоттар устудьуоннарыгар стипендияҕа эбии көмө харчы көрүллэрэ олус улахан өйөбүл этэ, билигин ити суоҕа сүрдээх охсуулаах.

«Онон Арктика сайдыытыгар туһуламмыт министерство үлэлээтэҕинэ, хоту сир кэнэҕэски кэскилин түстүө этэ диэн биһиги, хоту сиртэн төрүттээх ыччат, Ил Дархан Туһаайыытын үөрэ иһиттибит. Айсен Сергеевич этиитэ олоххо киирэригэр ыччат күүс-көмө буолуо диэн эрэннэрэбит», — диир Муома көхтөөх ыччата.

Ааптар: Светлана КРИВОШАПКИНА

This post was published on 27.12.2018 14:22 14:22