19 Кулун тутар 19.03
  • -19°
  • $ 91,98
  • 100,24

Муома улууһун баһаардара бохсулуннулар

17:21, 10 августа 2020
Текст:
Читайте нас на
Яндекс Новости
ЯДВ

Бу күннэргэ ардахтар түһэннэр, күөх халлааҥҥа күн чаҕылыччы көрөн ылла. Атырдьах ыйын 10 күнүгэр сарсыардаттан ардах тохтообокко түһэр. Олохтоохтор олус күүтүүлээх күннэрэ-дьыллара кэлэннэр, үөрүүлэрэ үксээтэ. Бу туһунан СИАҕа “Муома оройуона” МТ пресс-сулууспата иһитиннэрэр. 


Олохтоох дьон баһаар саҕаланыаҕыттан оттуулларын, үлэлэрин, дьиэлэрин умнан туран күннэри-түүннэри сырыттылар. Хонууга сүүһүнэн киһи баһаар бохсуутугар үлэлээтилэр. Массыына көлөлөөх тэрилтэлэр күүскэ көмөлөстүлэр. Биллэрин курдук, баһаар сиригэр чугаһынан уу суоҕун кэриэтэ, барыта кууран-хатан хаалбыта. Онно ууну таһыыга уу таһар массыыналар бары сырыттылар. Хас да километрынан баһаар турбут нэһилиэктэргэ трактористар утуйар ууларын умнан туран минерализованнай балаһалары хоруттулар.

Хонууга Владимир Слепцов, Айаал Егоров, Петр Корякин, Соболооххо Май Уваровскай, Николай Шкулев, Гаврил СтепановДмитрий Соркомов, Буор Сыһыыга Сергей Коркин, Михаил Алехин, Кулун Өлбүккэ Гаврил Уваровскай, Тимофей Атласов бэриниилээхтик үлэлээтилэр.

Буор Сыһыыга уонна Кулун Өлбүккэ олохтоохторго бу сиртэн силистээх ыччат дьон тахсан көмөлөстүлэр: Айаал, Николай Тарабукиннар, Алквиад, Артем, Александр, Дьулус Слепцовтар, Афоня Потапов, Павел Корякин, Иван Атласов, Алексей Буртахов, Аркадий Уваровскай, Игорь Садовников, Слава Тарабукин, Руслан, Иван Егоровтар, Женя Стручков, Иван Гурьев, Гоша Федоров, Слава Тарабукин, Анатолий Сен-Дун-Шен, Сандал, Айтал Яковлевтар, Анатолий Терехов уонна Виталтий Слепцов, Валерий Ефимов, Вася Осипов, Эрик Иванов.

Билигин нэһилиэктэринэн баһаарга көмөлөспүт дьон испииһэктэрин чуолкайдааһын, докумуон хомуйуу үлэтэ барар.

Баһаар уотун умулуннарыыга Саха Өрөспүүбүлүкэтин салалтата улахан көмөлөөх. Хас да күн устата салгынынан көтөр аал кэлэн баһаардары умуруорууга көмөлөстө, помпалары, булуугу, баһаарынньыктарга кураанах астары аҕалбыта. Ону сэргэ Саха сирин “Якутлесресурс” тэрилтэтин 16 үлэһитэ үһүс нэдиэлэлэрин тохтообокко нэһилиэктэр баһаардарыгар сылдьаллар.

Олохтоохтор салгынтан көмө кэлбитигэр махталларын биллэрэллэр. Баһаары бохсууга үлэлиир дьоҥҥо болҕомто көрүллэригэр итэҕэйэн, сүргэлэрэ көтөҕүллэн, санаалара күүһүрбүтэ. Кинилэргэ олохтоохтор махталлара муҥура суох.

Муома оройуонугар ойуур баһаардара тураннар, от ыйын 21 күнүгэр биллэриллибит ыксаллаах быһыы-майгы эрэһиимэ билигин да уһуллубат. Санатабыт, Хонууга, Буор-Сыһыыга, Кулун-Өлбүккэ биирдии уонна Соболооххо икки баһаардар турбуттара. Муомалар күн-дьыл туран биэрдэр, баһаар умуллуо диэн эрэнэллэр.

Следите за самым важным и интересным в Telegram-канале и WhatsApp-группе ЯСИА