Муома улууһугар от ыйын 21 күнүгэр киэьэ олохтоох бириэмэнэн 20 ч. 00 мүн. ыксаллаах быһыы-майгы эрэһиимэ биллэриллибит. Түүн баһаары умулуннарыыга 100 киһи баҕа өттүнэн үлэлии бартар, сарсыарданан кинилэргэ эбии 18 киһи көмөҕө тиийдэ. Бу туһунан СИАҕа «Индигир уоттара» хаһыат иһитиннэрэр.
Бу күннэргэ улууска балаһа тыаллаах куйаас, кураан күннэр тураннар, умуллубут уот хос күөдьүйэн, минерализованнай балаһаны уҥуордаан от ыйын 22 күнүгэр Хонуу нэһилиэгэр 3 км чугаһаата. Нефтебазаттан 2 км, аэронавигацияттан 1,7 км.
От ыйын 20 күнүгэр Индигир нэһилиэгэр ЧС биллэриллибитэ. Бастакы баһаар нэһилиэккэ бэс ыйыгар бэлиэтэммитэ. Билигин уот 2 км чугас баар, уот линияларыгар 1,5 км. Баһаары 30 киһи умуруорар.
Бүгүн от ыйын 22 күнүгэр улуус баһылыга Иван Петрович Дьокуускайтан “Якутлесресурс” ГАУ 10 байыаһын кытары кэлэр диэн, улуус дьаһалтатын пресс-сулууспата иһитиннэрэр. Маны таһынан Томпо улууһун Теплай Күлүүһүттэн уу ыһардаах бөртөлүөт кэлэрэ күүтүллэр. Олохтоохтор идэлээх дьоҥҥо уонна авиация көмөтүгэр эрэллэрэ улахан. Уот улаханын, бэйэ күүһүнэн умулуннарыы күчүмэҕэйдээҕин бэлиэтииллэр.
Санатар буоллахха, Муома улууһугар бастакы ойуур баһаара бэс ыйын 27 күнүгэр бэлиэтэммитэ. Уоту олохтоохтор күүстэринэн умуруортара. От ыйын 7 күнүгэр Муома улууһун баһылыга Иван Павлов дьаһалынан улууска ыксаллаах быһыы эрэһиимэ биллэриллибит. От ыйын 14 күнүгэр олохтоох прокуратура бырачыаһынан эрэһиим уһуллубут. Ол күн атын сиргэ тахсыбыт баһаартан ыксаллаах быһыы хос биллэриллибит. Уоту умулуннарыыгар барыта 372 киһи, 44 тиэхиньикэ үлэлээбитэ. От ыйын 16 күнүгэр ЧС бэлэм буолуу эрэһиимигэр уларыйбыта.
