Анна Алексеевна Атласова (Заболоцкая) 1957 сыллаахха 7-ис кылааска үөрэнэ сылдьан, комсомол кэккэтигэр киирбитэ. Онно райкомол бастакы сэкирэтээринэн Афанасий Егорович Алексеев үлэлиирэ. Үрүйэ Төрдүн маҥнайгы сүһүөх комсомольскай тэрилтэтин 1966-1968 с.с. сэкирэтээрэ Анна Алексеевна Хомсомуол кэмнэрин билигин да долгуйа ахтар.
Оччолорго Муома оройуонугар үгүс үтүө эдэр эрчимнээх дьон хомсомуолга үлэлээн ааспыттара. Ол саҕана райкомол сэкирэтээрдэринэн М.Н. Николаев, А.Е. Алексеев, В.Л. Дягилев, П.Н. Старков, В.Г. Неустроев, А.С. Алексеев, С.Г. Тарабукина үлэлээбиттэрэ. Бары да дьоһун өйдөөх-санаалаах, кыахтаах салайааччылар этилэр.
1966 с. Хомсомуол уобаластааҕы комитетын бастакы сэкирэтээринэн Николай Иванович Соломов талыллыбыта. Кини чаҕылхай киһи этэ. Онтон ыла үлэ эстафетатын оччотооҕу эдэр көлүөнэ илиигэ ылбыта. Комсомол 1966 сыллаахха буолбут уобаластааҕы комитетын конференциятын уураахтарын олоххо киллэриигэ үлэ күүскэ ыытыллыбыта. Ол кэмнэргэ оройуоннааҕы комсомольскай тэрилтэ хаста да ЫБСЛКС обкомун Кыһыл Знамятынан наҕараадаламмыта, сэкирэтээр П.Н. Старков этэ.
Хомсомуол обкома араас өрүттээх элбэх ыҥырыылары таһаарбыта. «БАМ тутуута», «Оскуола–производство–үрдүк үөрэх», «Бэйэҥ сулускун умат» хамсааһыннары өйөөн хомсомуоллар уонна ыччаттар ыҥырыы таһааран араас өрүттээх үлэни көҕүлүүллэрэ. Үрүйэ Төрдүн комсомолецтара уонна ыччаттара бу ыҥырыыны оройуоҥҥа бастакынан өйөөбүттэрэ, ыччат-хомсомуол биригээдэлэр тэриллибиттэрэ. Ол курдук таба иитиитигэр «Чыбааҕылаах» ыччат биригээдэтэ тэриллибитэ. Биригэдьииринэн М.Н. Голиков ананан, оройуоҥҥа ыҥырыы таһааран биир улахан ыстааданы туппута. Наствник биллиилээх табаһыт Г.П. Слепцов-I этэ. Бу ыстаада социалистическай куоталаһыыга оройуоҥҥа бастыыра, улахан табаны тыыннаах иитиини 90%-ҥа тиэрдэрэ. Оччолорго ыстаадаҕа элбэх ыччат үлэлээбитэ: Д. И. Слепцов, Е. К. Никулина, М. Г. Слепцова, К. К. Никулин, В. Н. Слепцова, И. А. Черов, И. И. Атласов.
Оттооһуҥҥа Тумул Күөлүн ыччат-хомсомуол звенота тэриллэн, хас да сыл былааннарын субуруччу аһары толорон, бастыҥнар кэккэлэригэр сылдьаллара. Ол сылларга аан бастаан «Оскуола–производство–үрдүк үөрэх» ыҥырыыны бастакынан Үрүйэ Төрдүн кыргыттара өйөөбүттэрэ. Александра уонна Вера Иннокентьевна Слепцовалар 100 ыччат сүөһүнү тутан «Хара Төҥүргэс» диэн ыраах учаастакка икки сыл үлэлээн баран, үрдүк үөрэххэ киирэн учуутал идэтин ылан, бэйэлэрин нэһилиэктэригэр учууталынан үлэлээн кэллилэр. Сылгы иитиитигэр Сэбиэскэй Аармыйа кэккэтигэр ытык иэһин төлөөн, үс сыл сулууспалаан кэлэн баран Гаврил Гаврильевич Черов үлэлээбитэ. Кинини аҕата оройуон биир бастыҥ үлэһитэ, Үлэ Кыһыл Знамя уордьан кавалера Гаврил Иванович Черов сылгы иитиитин мындыр идэтигэр уһуйбута.
Тыа хаһаайыстыбатын араас салааларыгар үлэлиир дьон чулууларын түмэр, ыччакка бэйэлэрин баай уопуттарын тарҕатар, үлэҕэ үрдүк көрдөрүүнү ситиһээччилэр аҕыйаҕа суохтара. Ордук тыа хаһаайыстыбатын бары салааларыгар: үүтү ыаһын, эти, үүтү государствоҕа туттарыы, түүлээҕи бултааһын былаана аһары толоруллара. Ону тэҥинэн бары государственнай тэрилтэлэр: эргиэн отделениета, сибээс, киноустановка, эмп, оҕо тэрилтэлэрэ бары пятилетка былааннаах сорудахтарын толорон иһэллэрэ.
ҮТМСКТ 42-45 комсомол чилиэнин түмэрэ, кинилэр үлэ бары салааларыгар ситиһиилээхтик үлэлииллэрэ. Табаҕа ыстаада старшайа М.Н. Голиков, Д. И. Слепцов, сылгыһыт Г. Г. Черов Саха сирин комсомолун «Бастыҥ эдэр гвардеец» бэлиэнэн наҕараадаламмыттара. Мария Гаврильевна Слепцова Комсомол уобаластааҕы комитетын конференциятыгар делегатынан, Варвара Николаевна Слепцова оройуон Сэбиэтин депутатынан, Николай Константинович Никулин эдэр табаһыттар республикатааҕы слеттарыгар, учуутал Дмитрий Никитич Петров эдэр учууталлар республикатааҕы конференциятыгар делегатынан талыллан республика ыччатын форумугар кыттыбыттара.
Комсомолецтар элбэх общественнай үлэни толороллоро, араас субуотунньуктар буолаллара. Хотоннору өрөмүөннээһин, тэрилтэлэргэ мас, муус бэлэмнээһинэ, кэнсиэртэргэ кыттыы, таба ааҕыыта, субан сүөһүнү көһөрүү, оттооһун, бөһүөлэги ыраастааһын курдук үлэлэргэ эдэр ыччат хото кыттара, тэрийсэрэ. Эйэ фондугар үбү киллэриигэ биһиги комсомольскай тэрилтэбит куруук бастакы буолара. Үрүйэ Төрдүн комсомолецтара уонна ыччаттара детсад иитээччитэ Елена Гаврильевна Дьячкова, учуутал Дмитрий Никитич Петров, киномеханик Василий Васильевич Гоголев, суоппар Михаил Семенович Хадаров, атыыһыт Евдокия Иннокентьевна Слепцова, бороон көрөөччү Елена Иннокентьевна Атласова, иитээччи Марта Иннокентьевна Хадарова, суоппар Егор Егорович Охлопков, үлэ араас салааларыгар үлэлиир Иван Иннокентьевич Атласов, ветеринар-врач Александр Васильевич Мытыкынов, сылгыһыт Дмитрий Иннокентьевич Слепцов-II, тракторист Владимир Никитич Андросов – тустаах да, общественнай да үлэлэргэ үлэҕэ-үөрэххэ өрүү көхтөөх буолаллара.
— Билиҥҥи көлүөнэ ыччат олох уларыйыытын кытта тэҥҥэ хаамсан үлэлээх, үөрэхтээх буолуҥ! Оройуоҥҥут сайдыытыгар сэмэй кылааккытын киллэрсиҥ! — диир Анна Атласова.
Ааптар: Анна Атласова (Заболоцкая)
