Муома Хонуутугар өтөрүнэн кыаллыбатах өрөмүөннээх балыыһа тымныытынан биллэр. Салалта киин сиртэн кэлбит хампаанньалар барыс эрэ ылаары үлэлииллэриттэн кэлэйэн, бу сырыыга олохтоох тэрилтэни кытта дуогабардаспыт.


Хонууга уруккуттан төһө да өрөмүөн барбытын үрдүнэн, тымныытынан биллэр хирургия отделениетыгар 3 мөл. 200 тыһ. суумалаах хантыраак оҥоһуллубут. Үлэ номнуо үмүрүйэн эрэр.

Кылаабынай быраас И.И. Харлампьева этэринэн, көрүллүбүт харчыга муостаны олоччу көтүрэн, саҥалыы оҥорбуттар, тымныыны аһарбат матырыйаалынан бүрүйэн, линолеум тэлгээбиттэр. Көрүдүөргэ батарея эбии туруоруллубут, түннүктэр уларыйбыттар. Бөҕө-таҕа үктэллээх дьоҕус кирилиэс оҥоһуллубут.

Терапевт-быраас Айталина Спиридоновна Васильева:

– Саамай кылаабынайа сылытыы үлэтэ барда. Муоста анныгар мас көөбүлүн эбии куппуттара, киирэр ааны сылыппытара олус үчүгэй, — диэн бэлиэтиир.

Пермьтэн кэлбит хирургия отделениетын сэбиэдиссэйэ хирург Смирнов Николай Васильевич уонна Владивостоктан сылдьар анестезиолог-быраас Пономарев Юрий Михайлович быйыл үлэлиир сирдэрэ сылыйарыгар эрэнэллэр.

Дьахталлар оҕолонор отделениеларын сэбиэдиссэйэ, ыраах Краснодартан Муомаҕа үлэлии кэлбит профессор Виталий Николаевич Патутин өрөмүөн үлэтиттэн астынарын биллэрдэ.

Хирургияҕа эрэ харчы көрүллүбүтэ, терапия өрөмүөнүн бэйэбит күүспүтүнэн оҥордубут. Ону таһынан тубдиспансер ортотунан быһылынна, куукуна тубуста, – диэтэ кини.

Ираида Ивановна атын сиртэн ким да үлэлээбэтэҕин, барытын олохтоох дьон оҥорбуттарын тоһоҕолоон бэлиэтиир.

– Харчы көстүбэккэ, рентгенкабинет поликлиникаҕа көспөтө. Эһиил 1,5 мөлүйүөнү буллахпына көһөртөрүөм, оччоҕуна ыарыһахтар биир сиргэ көрдөрүө этилэр, – диир кылаабынай быраас.

Ааптар: Григорий ФЕДОТОВ

0
0
comments powered by HyperComments