Кэбээйи улууһун Мукучу нэһилиэгин “Кырдал” түмсүүтэ “Сунтаар миигин ыҥырар — 2019” ырыа-хоһоон түһүлгэтигэр баран кыттыыны ылла. Айар куттаах мукучулар бу тэрээһиҥҥэ Леонид Попов уонна Тимофей Сметанин алтыһыыларыгар олоҕурбут “Чуумпуга” диэн хоһоонунан дьүһүйүүнү көрдөрдүлэр.
Мукучу нэһилиэгин олохтоох бибилэтиэкэрэ Ксения Егоровна Новикова сунтаардар тэрээһиннэригэр хайдах кыттыбыттарын туһунан сырдатар:
— Балаҕан ыйын 5 күнүгэр “Сунтаар миигин ыҥырар — 2019” өрөспүүбүлүкэтээҕи ырыа-хоһоон түһүлгэтэ култуура, сынньалаҥ пааркатыгар ыытылынна. Түһүлгэ ыалдьыттарынан суруйааччылар, учуонайдар, суруналыыстар: Уйбаан Уххан, Зоя Башарина, Михаил Санников – Уол Сарсын, Антонина Христофорова – Хагдаанай, Георгий Белоусов – Мичил, Саргылаана Спиридонова – Кэрэмэс кийиитэ, Ангелина Шадринова – Суоһааны, Ангелина Васильева – Дайыына, Афанасий Гуринов – Арчылан, Саргылаана Гольдерова – Саргы Куо, Галина Нельбисова, Валериан Николаев, Надежда Егорова – Намылы, Марта Николаева – Сарыалыйа, поэт аймахтара Изабелла Ильинична Попова, Екатерина Попова. Уонна Мирнэй куораттан, Дьокуускайтан араас айар талааннаах дьону түмпүт “Айар кут”, Ньурбаттан “Ньурба уоттара”, Кэбээйиттэн “Кырдал” айар түмсүүлэр. Леонид Попов ырыаларын толорор Саха эстрадатын ырыаһыттара Байбал Сэмэнэп, Тамара Попова бааллар.
Мирнэй куорат айар куттаахтарын түмсүүтүгэр Сангаарга үлэлээбит М.И.Хон, Л.В.Богданова кыттыыны ыллылар. Олохторун үтүө сыллара ааспыт сирдэригэр Сангаар дьонугар, чуолаан кыраайы үөрэтээччи Иванова Р.А. истиҥ эҕэрдэлэрин ыыттылар. Маргарита Хон – Чөмчүүк диэн аатынан суруйар хоһоонньут. Леонид Поповка анабыл хоһоон күрэҕэр кыттан 46 үлэттэн кини хоһооно биэс бастыҥ иһигэр киирэн биһирэммитэ.
“Сунтаар миигин ыҥырар -2019” саха норуодунай бэйиэтэ Леонид Попов төрөөбүтэ 100 сылыгар анаммыт үбүлүөй эрдэттэн былааннаммытын курдук бырагырааматыттан кыратык да уларыйбакка олус тэрээһиннээхтик ааста. Бастакы күн бэйиэт төрөөбүт сиригэр Уһун Күөлгэ саҥа таас оскуола аһыллыбыт, музей сөргүтүллүбүт. Олус истиҥ тэрээһин буолбутун туһунан кэпсээбиттэрэ. Леонид Попов туһунан быраас идэлээх Валериан Николаев (бу суруйааччы Галина Нельбисова, суруналыыс Надежда Егорова – Намылы бииргэ төрөөбүт убайдара эбит) “Хочо хоһуун хоһоонньута”, композитор Кирилл Герасимов “Саныыбын төрөөбүт алааспын” ырыанньыгын, Сунтаар айар дьонун “Ньургуһун” түмсүүтүн саҥа кинигэлэрин сүрэхтэниилэрэ буолбута.
Биһиги түмсүүбүт Сунтаарга култуура, сынньалаҥ пааркатыгар буолбут айар куттаах дьон тэрээһиннэригэр кыттыыны ылла. Эрдэттэн торумнаабыппыт курдук Леонид Попов уонна Тимофей Сметаниммыт алтыһыыларыгар олоҕурбут “Чуумпуга” диэн хоһоонунан дьүһүйүүнү көрдөрдүбүт.
