Коронавирус инфекциятыттан нэһилиэнньэни харыстыыр туһуттан муҥутуур бэлэмнээх буолуу эрэһиимэ өрөспүүбүлүкэҕэ бу сыл ыам ыйын 31 күнүгэр диэри уһаата. Тустаах ыйаахха Ил Дархан Айсен Николаев бэҕэһээ, муус устар 29 күнүгэр илии баттаата.
РФ Бырабыыталыстыбатын кулун тутар 2 күнүнээҕи 300№-дээх уурааҕынан ыам ыйын 1 күнүтэн 65 саастарын ааспыт дьоҥҥо тэйиччиттэн электроннай больничнай лиис оҥоһуллара тохтуур.
Итинэн сибээстээн Айсен Николаев үлэ биэрээччилэргэ туһаайан 65 саастарын ааспыт уонна дьарҕа ыарыылаах үлэһиттэрин дьиэттэн үлэҕэ көһөрөллөрүгэр сүбэлиир. Ити көрүҥ кыаллыбат түгэнигэр үлэһиттэри сыллааҕы уоппускаларыгар эбэтэр сөбүлэҥ быһыытынан төлөммөт уоппускаҕа ыыталларыгар этиллэр.
Дойду үрдүнэн ыам ыйын 1 күнүттэн самоизоляция эрэһиимэ үлэлии сылдьар 65 саастарын ааспыт дьоҥҥо тохтуур. Саастаах дьон үлэҕэ тахсар түгэннэригэр маасканы кэтэллэрэ булгуччулаах.
Үлэлээбэт саастаах дьон ыам ыйын 31 күнүгэр диэри бэйэлэрин харыстаналлара булгуччулаах, элбэх киһилээх сиргэ сылдьыбаттара ирдэнэр.
65 саастаах үлэһиттэргэ үлэҕэ тахсалларыгар үлэ биэрээччи бэйэтин суотугар ПЦР анаалыһын оҥотторор итиэннэ ыарыы суох буоллаҕына үлэҕэ таһаарар. Быһыыны ылбыттарга эбэтэр коронавируһунан ыалдьыбыттарга ити миэрэ туттуллубат.
Саастаах үлэһиттэр командировкаҕа бараллара бобуллар. Үлэ кэмигэр сирэй көрсүүнү тумналлара ирдэнэр, видео-конференцсибээс, төлөпүөн, электроннай эргиэн нөҥүө үлэлииллэрин сүбэлииллэр. 2 — 4 чаас буола-буола дезинфекция ыытыллара, салгыны ыраастыыр тэриллэр холбоноллоро ирдэнэр.
Саха сирин үрдүнэн түүҥҥү кулууптар, караоке-саалалар, сааратар-сынньатар сирдэр, ол иһигэр атыы-эргиэн дьиэлэригэр баар сирдэр ыам ыйын 31 күнүгэр диэри тохтотулуннулар.
Ыйаах ыам ыйын 1 күнүттэн күүһүгэр киирэр.
Муус устар 29 күнүнээҕи «О внесении изменений в отдельные правовые акты Главы Республики Саха (Якутия)» 1842 №-дээх укааһы сиһилии манна билсиэххэ сөп здесь.
