Саха сирин эдэр саахыматчыттара сыллата ыытыллар “Moscow Open-2017” аан дойдутааҕы күрэхтэһиигэ сөбүлээн кытталларын туһунан edersaas.ru таҕыста.
Айанын үбүн-аһын бэйэҥ уйунар буоллаххына, ким баҕалаах усунуос төлөөн кыттыан сөп. Бу да сырыыга Саха сирин хамаандата балайда халыҥ: 19 үөрэнээччи, 7 устудьуон, 1 бэтэрээн оонньооччу уонна 2 тренер. Итиннэ өссө хас да төрөппүтү эбэн кэбис.
Мэлдьи буоларын курдук, “Moscow Open” бэйэтэ хас эмэ тус-туспа турнирдарга араарыллар, онон уопсай кыттааччытын ахсаана икки тыһыынчаҕа чугаһыыр. Саамай күүстээхтэр “А” турнирдарыгар наар гроссмейстердар уонна маастардар, ол эбэтэр 2300-тэн үөһэ ЭЛО рейтиннээхтэр кытталлар. Быйыл биһиги маастардарбыт тоҕо эрэ тутуннулар. Арай хорсунун киллэрэн, Дьокуускай куорат 17-с оскуолатын тохсус кылааһын үөрэнээччитэ, маастарга хандьыдаат Айтал Местников эрэ күүстээхтэри кытта оонньоото. 15-16 саастаах оҕо киһиэхэ чахчы ыарахан ноҕурууска. Ол да буоллар, Айтал биэстэ тэҥнэстэ, биирдэ хотто, арай 1-кы, 5-с, 6-с туурдарга хоттордо. Онон уопсайа 3.5 очукуоланна.
Устудьуоннар бары кэриэтэ РСГУ (Россиятааҕы судаарыстыбаннай социальнай университет) 13-с кубогын “Е” турнирыгар оонньоотулар. Манна барыта 125 кыттааччыттан – алтата биһиги оҕолорбут. Онуоха саамай бастыҥ көрдөрүүнү 19 саастаах маастарбыт Василий Васильев (ЭЛО-2330) ситистэ: кини 9 туур оонньоон 6 очукуоланна уонна 15-с миэстэҕэ тигистэ. Маастарга хандьыдаат Руслан Пахомов (ЭЛО-2270) 5,5 очукуолаах, 27-с миэстэ. Кыргыттартан 18 саастаах Айыына Егорова уопсайа 5 очукуоланна уонна 40-с миэстэҕэ таҕыста. Ол эрээри, кыргыттар ортолоругар Айыына үһүс миэстэлэммитин этиэххэ наада. Маастарга хандьыдааттар Алена Бурмистрова, Айсена Васильева (иккиэн Таатта), Вилена Попова (Нам) көрдөрүүлэрэ сэмэй.
Бэтэрээн саахыматчыттар бөлөхтөрүгэр Саха сириттэн соҕотох Тускул Далаанович Килбиэнэп сылын аайы кыттар. Сороҕор син тос курдук оонньоон бириискэ тиксээччи. Быйыл тоҕо эрэ ыарырҕатта, 5 очукуону хомуйан, 171 киһиттэн 62-с миэстэлэннэ.
Саахыматы таптаан оонньооччулар “С” бөлөхтөрө хаһан да саамай элбэх кыттааччыны түмэр. Бу сырыыга 379 саахыматчыт суруттарда. Ол иһигэр араас таһымнаах маастардар, үксүлэрэ маастарга хандьыдааттар. Саха сириттэн соҕотоҕун кыттыбыт саамай эдэр маастарбыт, онус кылаас үөрэнээччитэ Айсен Местников үчүгэй түмүгү ситистэ: 7 очукуо. 11-с миэстэ. Ити көрдөрүүтүнэн Айсен үөрэнээччилэр ортолоругар үһүс миэстэни ылла. Онон ЭЛО рейтинин 52 пуун эбиммитин бэлиэтиир наада.
Оҕолор “Д” турнирдарыгар сааһынан саамылаһан Саха сириттэн 17 үөрэнээччи кытынна. Манна Дьокуускайтан Арсений Чумаевскай, Настя Андреева, Айдын Местников, Уус Алдантан Ньургуйаана Баишева, Мэҥэ Хаҥаластан Денис Назаров 6-лыы очукуону ылан, үчүгэй түмүгү ситистилэр.
