Мирнэйгэ АЛРОСА хаһаайыстыбаннай актыыбын сыллааҕы мунньаҕа бара турар

0
13

АЛРОСА-ҕа 2017 сыл хайдах ааста? Бу сыл хайдах буолуоҕай? Хампаанньаҕа ханнык уларыйыылар күүтүллэллэр? Бу уонна атын боппуруостары АЛРОСА бөлөҕүн хаһаайыстыбаннай актыыбын сылы түмүктүүр мунньаҕар дьүүллэһэллэр.


Бүгүн хампаанньа алмааһы хостооһуҥҥа аан дойдуга саамай бөдөҥнөрүнэн буолар. АЛРОСА тэрилтэлэринэн 2017 сылга 39,6 мөл караат алмаас хостонно.

Саха сирин баһылыга Егор Борисов өрөспүүбүлүкэ АЛРОСА сүрүн акционерынан буоларын бэлиэтээтэ. Кини этэринэн, 2009 с. экэниэмикэҕэ кириисис кэмигэр АЛРОСА бордууксуйатыгар наадыйыы аччаабытын кэннэ тэрилтэ кэккэ ыарахаттары көрсүбүтэ. Маннык усулуобуйаҕа регион салалтата Россия Федерациятын премьер-миниистирин Владимир Путин аадырыһыгар көрдөһүү түһэрбитэ. Ити түмүгэр хампаанньаҕа уларытыылары киллэрэр бырагыраама ылыныллыбыта.

Мэлдьи саҥа кыахтары көрдүөххэ наада”, — диэн туран кини АЛРОСА кэлэктиибигэр өрөспүүбүлүкэ социальнай-экономическай сайдыытыгар кылаатын иһин махталын биллэрдэ.

Хампаанньа бэрэсидьиэнэ Сергей Иванов 2017 сыл хампаанньаҕа саамай уустуктук ааспытын бэлиэтээтэ. “Биһиги “Мир” рудникка тахсыбыт саахалы туораатыбыт”, — бэлиэтээтэ кини. “Саахал да тахсыбытын үрдүнэн, хампаанньа хостооһуҥҥа рекорду ситистэ – 39,6 мөл карат алмааһы. Бу сэбиэскэй кэм кэннинээҕи кэмҥэ АЛРОСА историятыгар рекордунан буолар. Тэрилтэ хайа маассатын обработкалааһыҥҥа, алмааһы хостооһуҥҥа, ыраас барыһы ылыыга былаанын аһары толордо”, — диэн иһитиннэрдэ Иванов.

Хаһаайыстыбаннай актыып 22-с мунньаҕа аныгылыы интерактивнай уонна мультимедийнай ньыманан ыытыллар. Бастаан маннык мунньахтар бары сыахтарга буолан ааспыттара. Хамнаска, уларыйыыларга, социальнай инфраструктураҕа сыһыаннаах 170 ыйытыы киирбитэ.

0
0
[the_ad_group id="742"]