Ийэ тыл уонна сурук-бичик күнүгэр Суорун Омоллоон аатынан Опера уонна балет судаарыстыбаннай театрыгар улахан тэрээһин олохтонор. Тэрийээччилэр Саха сирин олохтоохторун көхтөөх кыттыыны ыларгытыгар ыҥыраллар.
Саха Өрөспүүбүлүкэтин Ил Дарханын уонна Бырабыыталыстыбатын Дьаһалтатын Тыл сайдыытын боппуруостарын сүрүннүүр управлениетын, Саха Өрөспүүбүлүкэтин Үөрэҕин уонна наукатын министиэристибэтин, Саха Өрөспүүбүлүкэтин Култуураҕа уонна духуобунай сайдыыга министиэристибэтин, Арктикатааҕы култуура уонна искусство судаарыстыбаннай институтун тэрээһиннэринэн Ийэ тыл уонна сурук-бичик күнүн көрсө олунньу 13 күнүгэр киэһэ 6 чаастан Суорун Омоллоон аатынан Опера уонна балет судаарыстыбаннай театрыгар ыҥыраллар.
Бу күн төрөөбүт тылбыт баайа түмүллүбүт саха тылын быһаарыылаах тылдьытын уонна Саха сирин хотугу норуоттарын тылларын аан дойдутааҕы интернет-порталын киэҥ түһүлгэҕэ билиһиннэриэхтэрэ.
«Тылбыт сайдыытын түстүүр, сомоҕолуур дьоро киэһэҕэ үөрэ-көтө түмсүөҕүҥ!», — диэн суруллар иһитиннэриигэ.
