Көҥүл тустууга ССРС спордун үтүөлээх маастара, 1976 сыллаахха Монреаль куоракка ыытыллыбыт Олимпиада үрүҥ көмүс призера Александр Иванов бирииһигэр анаммыт турнирга Саха сирин соҕуруу куоратыгар – Мииринэйгэ 169 уол тустуу түһүлгэтигэр күөн көрүстүлэр.
Мииринэйдээҕи оҕо-ыччат спортивнай оскуолатын 11 иитиллээччилэрэ күрэхтэһиигэ чөмпүйүөннээтилэр уонна бириистээх миэстэлэри ыллылар.
Ыстаарсай тренер Василий Корякин дьарыктыыр 30-тан тахса 2000 уонна ол кэннинээҕи сылларга төрүөх уолаттар бастыҥ көрдөрүүлэри ситистилэр. Эдэр тустууктар Руслан Ибрагимов, Ньургун Андреев, Айтал Сидоров, Владислав Николаев, Андрей Иванов, Иван Лебедев уонна Анар Амралиев араас ыйааһыннарга иккис уонна үһүс миэстэлэри ыллылар. Ярослав Старыгин, Ислам Магомедов, Эрлан Токтосунов уонна Заур Магомедов чөмпүйүөн үрдүк аатын ыллылар. Турнир бастыҥ тустуугунан Эрлан Токтосунов ааттанна.
