Мииринэй куоратыгар САССР спордун маастара Аркадий Никифоров аатынан хапсаҕайга өрөспүүбүлүкэтээҕи турнир буолар. Бириис фондата 2 мөл. солк., икки ыйааһыҥҥа муҥутуур кыайыылаахтар 400 тыһ.солк. илдьэ барыахтара. 


Мииринэйтэн хапсаҕайга бастакы спорт маастара Аркадий Никифоров аатынан турнир бэһис сылын тэриллэр. Быйылгы күрэхтэһиини «АЛРОСА» АХ уонна «Оком» родовой община ыыталлар.

Тэрийээччилэр былаанныылларынан, 200-тэн тахса тустуук Саха сирин бары муннуктарыттан кыттар. Күрэхтэһии олунньу 28 — кулун тутар 1 күннэригэр «Кимберлит» спорт дыбарыаһыгар ыытыллыаҕа.

Алта ыйааһыҥҥа эр дьон, итиэннэ уолаттар уонна бэтэрээннэр биэстии ыйааһыҥҥа көбүөргэ тахсыахтара. Биирдиилээн категорияларга чемпионнар уонна призердар сыаналаах бириистэринэн наҕараадаланыахтара. Маны сэргэ турнир «А» кылаастаах, онон мэтээллээхтэр өрөспүүбүлүкэ спордун маастара ааты ылалларыгар бааллары хомуйуохтара.

Муҥутуур кыайыылааҕы быһаарыыга икки ыйааһыҥҥа киирсиэхтэрэ — 70-ҥа диэри уонна 70-тан үөһэ киилэлээхтэргэ. Кыайыылаахтар 400-түү тыһ.солк. тутуохтара. Тэрийээччилэр маннык бириистэрдээх күрэхтэһиигэ өрөспүүбүлүкэ саамай күүстээх хапсаҕайдьыттара киирсэллэригэр, онон көрөөччүлэргэ олус интэриэһинэй буоларыгар эрэллээхтэр.

0
0

Хоруй суох