Мииринэй улууһун Алмазнай бөһүөлэгэр 275 миэстэлээх саҥа оскуола үлэҕэ киирдэ. Оскуоланы аһыы үөрүүлээх тэрээһинэ бүгүн, атырдьах ыйын 31 күнүгэр буолла. Бу туһунан Ил Дархан уонна Бырабыыталыстыба пресс-сулууспата иһитиннэрэр.
4№-дээх оскуола үөрэнээччилэрин, учууталларын, төрөппүтэрин, нэһилиэк олохтоохторун Ил Дархан Айсен Николаев эҕэрдэлээтэ: «Оскуола сыбаайата 2018 сыллаахха балаҕан ыйын 3 күнүгэр түспүтэ. Онно элбэх киһи эбийиэк икки сылынан үлэҕэ киириэн итэҕэйбэтэҕэ. Пандемиянан сибээстээн үлэ тохтоон, бытааран хаалбакка оскуола былааннаммыт кэмигэр үлэҕэ киирэриттэн үөрэбин». Ил Дархан оҕолорго ситиһиилээх үөрэҕи, дойдуларыгар бэриниилээх дьон буола улааталларыгар баҕарда.
Урут 4№-дээх оскуола үөрэнээччилэрэ эргэ мас дьиэҕэ үөрэммиттэр. Саҥа оскуола биэс тыһыынча кв миэтэрэ иэннээх. Манна актовай, спортивнай саалалардаах, улахан остолобуойдаах, икки лингафоннай кабинеттаах, искусство, бибилэтиэкэ, уҥкүү, лаборантскай, айымньы хостордоох. Оскуола тиэргэнигэр оҕо оонньуур былаһааккалаах.
Оскуоланы инвестиционай бырагырааманан «Кинг-95» тэрилтэ туппут. Тутуу 508 мөл солк өрөспүүбүлүкэ итиэннэ улуус бүддьүөттэрин үбүнэн тутуллубут.
