Бырабыыталыстыба эмсэҕэлээбит салаалары өйүөҕэ. Ол курдук, ФОТ 3.0 саҥа чэпчэтиилээх кирэдьиит бырагыраамата үлэлиэҕэ, манна 7,7 млрд солкуобай ыытыллыаҕа. Бырагыраама усулуобуйатын туһунан уураахха Михаил Мишустин илии баттаата  диэн Саха сирин Урбаан министиэристибэтэ иһитиннэрэр.


ФОТ 3.0 бу иннинэ үлэлээбит, болдьоҕо муус устар 1 күнүгэр туолар бырагырааманы солбуйуоҕа. Кириисис иннинээҕи таһымы үгүстэр кыайан ситиспэтэхтэринэн, бырагырааманы салгыырга быһаардылар. Маныаха кирэдьиит ставката 3% тэҥнэһиэҕэ. Бастакы сыл аҥаарын устата иэс ылааччы сүрүн иэһин уонна кирэдьиитин бырыһыанын төлүө суоҕа. Сыл иккис аҥарыттан маны тэҥ өлүүнэн ый аайы төлүөхтэрэ.

Бырагыраамаҕа дьоҕус уонна бөдөҥ хампаанньалар кыттыахтара. Олор истэригэр – гостиница уонна ресторан биисинэһэ, култуура, туризм, успуорт эйгэтэ. Кирэдьиит кээмэйэ үлэһит ахсааныттан тутулуктаныаҕа. Муҥутуур суума – 500 мөл. солкуобай. Сүрүн усулуобуйа: иэс ылааччы кирэдьиитин дуогабара үлэлиир кэмигэр үлэ миэстэтин 90 %-тан намыһаҕа суоҕу оннунан хаалларыахтаах. Кирэдьиити 2021 сыл кулун тутар 9 күнүттэн от ыйын 1 күнүгэр диэри оҥотторуохха сөп. Бырабыыталыстыба көрбүт үбэ чэпчэтиилээх ставканан уонна ырыынак сыанатын икки ардынааҕы араастаһыыны толуйууга, ону тэҥэ сыл бастакы аҥарынааҕы иэһи сабыыга барыаҕа. Чуолаан, судаарыстыба бааннарга дьиҥнээх иэстэн 6% ый аайы төлүөҕэ. Бааннар Экэниэмикэ сайдыытын министиэристибэтигэр туһаанаах сууманы биэрэргэ ыйытык оҥоруохтара.

Михаил Мишустин этэринэн, бырагырааманан 75 тыһыынча урбаанньыт туһаныаҕа.

Источник: © edersaas.ru 

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.