Миграннар оннуларыгар олохтоохтор үлэлиэхтэрэ

0
64

2018 сылга патенынан үлэлии кэлэр омук гражданнарын үлэлэтэри бобор туһунан былырыын Ил Дархан ыйааҕа тахсыбыта. Быйылгыттан испииһэк кэҥээн, тутуу, туһалаах баайы-дуолу хостооһун курдук салаалар киирдилэр. Онон бу этиллибит салааларга миграннары үлэлэтии бобулларын туһунан Дьарыктаах буолуу судаарыстыбаннай кэмитиэтин салайааччыта Степан Москвитин иһитиннэрдэ.


Ил Дархан Егор Борисов быһаарыытынан, туһалаах баайы-дуолу хостуур тэрилтэлэр Саха сирин территориятыгар урукку Сэбиэскэй сойуус өрөспүүбүлүкэлэрин, ол иһигэр Узбекистан, Таджикистан, Украина, Молдавия гражданнара кэлэн үлэлииллэрэ бобуллар. Онон барыллаан ааҕыынан, 2000 кэриҥэ үлэ миэстэтэ тахсара былааннанар. Степан Москвитин этэринэн, бу тахсыбыт миэстэҕэ олохтоох дьон үлэлиэҕэ.

Биһиги өрөспүүбүлүкэбитигэр миграннарга патент кээмэйэ 8762 солк. быһыллыбыта. Бу Арассыыйа үрдүнэн саамай үрдүк. Сыллата тас дойдулартан үлэлии кэлээччилэргэ квота кээмэйэ аҕыйыы турар. Ааспыт сылга 338 квота бэриллибит.

Санатан эттэххэ, 2017 сыллаахха Егор Борисов национальнай үлэ ырыынагын араҥаччылыыр уонна үлэтэ суох ахсаанын аҕыйатар сыалтан, миграннарга туһааннаах ыйааҕы таһаарбыта. Онно олоҕуран үөрэҕирии, доруобуйа харыстабылын, тырааныспар, атыы-эргиэн, балыктааһын, оҕуруот аһылыгын олордуу, хамсаабат баай-дуол атыытын салаатыгар омуктар үлэлииллэрэ бобуллубута.

0
0