Мэлдьэхсигэ дьоҕурдаах оҕолору дуобакка уһуйар 25 оҕолоох «Мындыр» лааҕыр от ыйын 13 күнүгэр үлэтин түмүктээтэ. Дуобакка 1‒7 кылаас оҕолоро Бэдьимэттэн, Сыымахтан, Төҥүлүттэн, Аллараа Бэстээхтэн, Майаттан, Мэлдьэхситтэн уонна Нам улууһуттан 14 хонук устата дьарыктаннылар.
Лааҕыр иитиллээччилэрэ оскуола интэринээтигэр олорон, күҥҥэ биэстэ тото-хана аһаан, хамаандаларынан, бөлөхтөрүнэн арахсан астына-дуоһуйа дуобаттаатылар.
Лааҕыр үөрүүлээхтик сабыллар күнүгэр түбэһиннэрэн мэлдьэхсилэр биир дойдулаахтара, дуобат аан дойдутааҕы федерациятын бэрэсидьиэнинэн, өр сылларга улуус баһылыгынан таһаарыылаахтык үлэлээбит, билигин өрөспүүбүлүкэ Ааҕар-суоттуур балаататын аудитора Владимир Птицын доҕотторун кытта: аан дойду таһымнаах дуобакка успуорт маастара, Россия сүүмэрдэммит хамаандатын старшай тириэньэрэ, Россияҕа уонна Европаҕа дуобат федерациятын вице-бэрисидьиэнэ, «Азия оҕолоро» оонньууга Башкортостан хамаандатын салайааччыта Юрий Чертоктуун уонна Казахстан уонна Азия дуобатын федерациятын вице-бэрисидьиэнэ, успуорт маастара Айрат Нургазиевтыын кэлэн ыалдьыттаатылар.
Юрий Черток 100 уонна 64 харахтаах дуобакка лааҕыр иитиллээччилэригэр, дуобакка сүгүрүйээччилэргэ 30 дуоскаҕа сеанс биэрдэ. Түмүк маастар туһатыгар буолла, кыайыыны оскуола үлэһитэ Дмитрий Степанов сурунна, Николай Степанов, Иван Семенов, Наталия Матвеева, Намтан Иван Эверстов, эдэр кэскиллээх оонньооччу Женя Романова тэҥнэстилэр.
Ыраахтан кэлбит ыалдьыттар Саха сирин олохтоохторун ыалдьытымсахтарын, өрөспүүбүлүкэбитигэр дуобат көрүҥэ күүскэ сайдан иһэрин бэлиэтээтилэр уонна Владимир Ильичтыын арахсыспат истиҥ доҕордуу буолалларыттан киэн тутталларын аһаҕастык кэпсээтилэр.
Бу иннинэ «Мындырга» М.К.Аммосов аатынан ХИФУ тириэньэрэ, норуоттар икки ардыларынааҕы таһымнаах гроссмейстер, аан дойдутааҕы олимпиадаҕа Бразилия дуобатыгар иккис миэстэлээх Николай Гермогенов салайааччылаах Кытай Народнай Өрөспүүбүлүкэтиттэн Хубэй провинциятыттан, Ухань куораттан 7 оҕо кэлэн 100 харахтаахха уонна 9 туурдаах Швейцария систиэмэтинэн дуобакка күрэхтэспиттэрэ. Ол түмүгүнэн сэттэлии киһилээх түөрт хамаанда көрсүһүүтүгэр улуус бастакы хамаандата бастакы, иккискэ кытайдар, үһүс миэстэҕэ улуус иккис хамаандата, төрдүскэ лааҕыр оҕолоро тасхыбыттара. Бу кэнниттэн 50 киһи кыттыылаах биирдиилээн бастыыр иһин күрэхтэһиигэ Швейцария систиэмэтинэн 9 туур оонньоммутугар, 16-лыы очукуолаах Николай Гермогенов (Дьокуускай), Анна Чупрова (Майа), Пань Имин (Кытай) миэстэлэспиттэрэ. Иккис күҥҥэ 8 оҕо төгүрүччү оонньуулара тэриллэн, уон бириистээх миэстэни туруорбуттарыгар бастакы миэстэни Пань Имин 37 ылла. Иккис, үһүс, төрдүс миэстэлэри Сандал Стручков уонна кытайдар үллэһиннилэр. Бэһис миэстэни 32 очукуолаах Проня Говоров (Мэлдьэхси), алтыс, сэттис миэстэлэри Кытай оҕолоро, тохсус Кирилл Алексеев, онуһу Дима Колесов (Мэлдьэхси) ыллылар.
«Мындыр» лааҕыр оҕолоро сынньалаҥнарын араас дойдуттан кэлбит улахан таһымнаах ыалдьыттары кытары көрсөн, тэҥҥэ күрэхтэһэн туһалаахтык атаардылар. Инникитин «Мындыр» лааҕырга кытайдар кыттыылаах маастар-кылаастары тэрийэн, бэйэбит оҕолорбутун Кытайга ыытан, уопут атастаһыытыгар уонна сайдыыга үлэлэһиэ этибит диэн салайааччылар эттилэр.
Дуобат мындыр албастарыгар уһуйааччынан Сэбиэскэй Сойуус успуордун маастара, Россия үөрэҕириигэ туйгуна, тириэньэр Василий Куприянов, лааҕыр салайааччытынан Ольга Семенова, иитээччинэн Анна Чупрова, ас астааччынан Любовь Степанова ананан үлэлээтилэр.
