29 Кулун тутар 29.03
  • -15°
  • $ 92,26
  • 99,71

Мээндиги Даниловтара айар талааннаах дьиэ кэргэн

13:01, 08 апреля 2020
Текст:
Читайте нас на
Яндекс Новости
ЯДВ

Мээндиги нэһилиэгин олохтоохторо  Алексей уонна Мария  Даниловтар дьиэ кэргэннэрэ тарбахтарыгар да талааннаахтар, айар-тутар да дьоҕурдаахтар. Кинилэр нэһилиэк биир саамай көхтөөх, холобурга сылдьар ыала.


П.И. Караканов-Бурдук Буокай аатынан Мээндиги орто оскуолатын технологияҕа учуутала Мария Данилова сиэлинэн оҥоһуунан дьарыктаммыта иккис сылыгар барда. Сэлээппэттэн саҕалаан, билигин сахалыы киэргэллэри оҥорууга ылсыста. Мария Иннокентьевна тарбаҕар талааннаах буолан, олус сатабыллаах.

“Арааһы бары гынар этим. Быысабайдаан да көрбүтүм, оҕуруонан да анньарым. Иистэнэрим. Ол гынан баран сиэлинэн дьарыктанан баран, дууһам хайдах эрэ онно сыһынна. Икки сыл буолла сиэлинэн үлэлээбитим. Сэлээппэттэн саҕалаабытым. Ким да улаханнык көрдөрбөтөҕө. Онон бэйэм сатыырбынан өрбүтүм. Онтон бу кэнники сахалыы симэхтэри өрөн эрэбин. Сэлээппэтээҕэр быдан үлэлээх эрээри, сөбүлээтим. Дьон да хайгыыр”, — диэн Мария мичээрдиир.

Дьон сэҥээрэр, этэргэ диэри хайҕаата. Билигин Мария оҥоһуктара атыыга хамаҕатык бараллар. Ол гынан баран, Мария киэҥник атыыга диэн оҥорбот. “Наһаа көрдөстөхтөрүнэ биэрэбин. Хайдах эрэ оҥоһуктарбын харыстыыбын. Аны сакааска үлэлиирбин сөбүлээбэт эбиппин. Бэйэм санаам кэлэринэн, толкуйбунан оҥорорбун ордорбун”, — диэн этэр маастар. Киэргэллэригэр бастаан тимири, оҕуруону кыбытар эбит буоллаҕына, билигин барыта дьиҥнээх матырыйааллартан туһанар. Холобур, тимир оннугар туоһу, таас оҕуруо оннугар мас оҕуруолары.

Кини кэргэнэ, Мээндиги нэһилиэгин аҕаларын түмсүүтүн бэрэсэдээтэлэ, ДНД солбуллубат чилиэнэ Алексей Афанасьевич киниэхэ күүс-көмө буолар. Соло буоллаҕына сиэл да аахсыан сөп, туоска оһуору да түһэрэр, сиэли булааччы эмиэ кини. Онтон иллэҥсийдэҕинэ, иэйиитэ киирдэҕинэ, тыаҕа сылдьан булбут удьурхайдарыттан араас кыыллары оҥорорун сөбүлүүр. Оннук Саха сирин кыылларын кэллиэксийэлээтэ. “Хаалбыт тобох удьурхайдартан оҥортуубун. Үчүгэйдэрин Дьокуускайга киллэрэн туттарааччыбын”, — диир Алексей Афанасьевич.

Даниловтар 4 оҕолоохтор. Кинилэр эмиэ төрөппүттэрин курдук айар-тутар талааннаахтар. Соҕотох кыыстара Айта худуоһунньук идэлээх. Кини уруһуйдарын “Чуораанчык”, “Колокольчик” оҕо сурунаалларыгар көрүөххэ сөп. Улахан уоллара Алексей ювелирга үөрэммитэ, орто уол Альберт олохтоох кулуупка операторынан үлэлиир, киинэ устуутунан дьарыктанар. Кылгас метражтаах киинэтэ өрөспүүбүлүкэтээҕи күрэххэ 3-с бириистээх миэстэни, онтон “Олох олуура” диэн киинэтэ улууска ыытыллыбыт күрэххэ “Бастыҥ режиссерскай үлэ” аатын ылбыта. Кыра уол Андрей Чурапчыга физкультурнай институтка үөрэнэр.

Следите за самым важным и интересным в Telegram-канале и WhatsApp-группе ЯСИА