29 Кулун тутар 29.03
  • -15°
  • $ 92,26
  • 99,71

Медицина киинэ анал бэлиэни ылыаҕа

Читайте нас на
Яндекс Новости
ЯДВ

Балаҕан ыйын 3 күнүгэр 202-с микрооройуоҥҥа Дьокуускай куораттааҕы Медицина киинин поликлиниката өрөмүөн кэнниттэн үөрүүлээх быһыыга-майгыга аһылынна.


Манна аһыллыбыт элбэх хайысхалаах бастакы сүһүөх медицинскэй көмөнү оҥорор оҕо анал киинэ – өрөспүүбүлүкэҕэ соҕотох. Өрөмүөҥҥэ туттуллубут 70 мөлүйүөн солкуобай медицинскэй страховка территориятааҕы фондатыттан уонна өрөспүүбүлүкэ бюджетыттан ылылынна.

Поликлиниканы үөрүүлээх быһыыга-майгыга аһыыга өрөспүүбүлүкэ вице-премьерэ Алексей Дьячковскай бэлиэтээбитинэн, Саха сиригэр өлүү Арассыыйа орто көрдөрүүтүттэн 50 бырыһыанынан аҕыйаабытыгар уонна киһи орто сааһа 70-ҥа тиийбитигэр, бастатан туран, эмчиттэр улахан өҥөлөөхтөр.

«Бу оройуон олохтоохторун баҕа санааларын учуоттаабыппыт кэрэхсэбиллээх. Оҕо киинэ олохсуйбут поликлиникатыгар улахан дьон эмиэ көрдөрүөҕэ. 70 саастарын аһарбыт аҕам саастаах дьоҥҥо гериатрия учаастага үлэлиэҕэ», – диэтэ куорат баһылыга Айсен Николаев.

СӨ доруобуйа харыстабылын миниистирин солбуйааччы Олег Припузов быраастарынан хааччыллыыга кыһалҕалар баалларын үрдүнэн, аныгы тиэхиньикэнэн сэбилэммит поликлиникаҕа ити боппуруос сотору кэминэн быһаарыллыаҕын туһунан иһитиннэрдэ.

Саҥа объекка киирэр лиэнтэни быһыы кэнниттэн Медицина киинин кылаабынай бырааһа Елена Борисова мустубут дьоҥҥо поликлиника кабинеттарын көрдөрдө.

Поликлиника биир саҥа көстүүтүнэн оҕону эмиийинэн аһатарга анал хос аһыллыбыта буолар. Медицина киинэ алтынньы 15 күнүгэр Доруобуйа харыстабылын бүтүн аан дойдутааҕы тэрилтэтиттэн «Эмиийинэн аһатыыга үтүө саналаах балыыһа» анал бэлиэни ылыаҕа.

Оҕолорго сырдык, уйаҕас эйгэни оҥорор туһуттан дьиэ эркиннэригэр Дисней уонна Арассыыйа мультиктарын дьоруойдарын уруһуйдаабыттар. Иккис этээскэ оҕолору аралдьытар хоско кинилэри уруһуйдуур осутол, оонньуурдар күүтэллэр. Оҕолорго аналлаах логопед, психолог, эндокринолог, офтальмолог, невролог, ортопед уо.д.а. быраастар кабинеттара бааллар. Сколиоһы эрдэттэн быһаарарга компьютернай топограф үлэлиэҕэ.

Бырааска көрдөрөргө 500-003 биир кэлим call-киин, www.er14.ru. электроннай сыһыарыы уонна mcykt.ru. сайт нөҥүө суруйтарыахха сөп.

Следите за самым важным и интересным в Telegram-канале и WhatsApp-группе ЯСИА