CӨ доруобуйа харыстабылын миниистирэ Михаил Охлопков суруналыыстары кытары көрүстэ. Брифиҥҥэ кэпсэтии чуолаан 2017 с. үрдүк технологиялаах медицинскэй көмөнү оҥоруу түмүктэрин уонна инники былааннар тустарынан барда. 2018 сылга доруобуйа харыстабылын салаатыгар биир сүҥкэн соругунан “Эр киһи доруобуйата” бырайыагы олоххо киллэрии буолуоҕа. 


Биллэрин курдук, Саха Өрөспүүбүлүкэтигэр үрдүк технологиялаах медицинскэй көмөнү (ВМП) доруобуйа харыстабылын сэттэ тэрилтэтэ оҥорор. Олор истэригэр Медицина Национальнай киинэ, Өрөспүүбүлүкэтээҕи 2 №-дээх балыыһа, офтальмология өрөспүүбүлүкэтээҕи клиническэй балыыһата, искэни эмтиир диспансер уо.д.а киирэллэр.

ВМП туһаныы сылтан сыл аайы элбиир. Ааспыт сылга итинник көмөнөн 6325 ыарыһах туһанна (2016 с. – 5927, 2015 с. – 4879). Кинилэртэн 62 бырыһыаннара өрөспүүбүлүкэҕэ бэйэтигэр эмтэннэ. Бу өрөспүүбүлүкэҕэ үрдүк технологиянан эмтиир тэрилтэлэр элбииллэрин кытары сибээстээх. Ол туһунан Михаил Охлопков: “2010-2012 сс. ыарыһахтарбыт 80 бырыһыаннара үрдүк технологиялаах көмөнөн туһанаары өрөспүүбүлүкэ тас өттүгэр тахсаллара. Онтон билигин өрөспүүбүлүкэ таһыгар 37 бырыһыаннара эрэ барарга күһэллэр”, – диэн эттэ. Манна даҕатан эттэххэ, 2011-2017 сс. үрдүк технологиялаах көмөнү оҥорорго федеральнай бүддьүөттэн эбии 280-тан мөлүйүөн көрүллүбүтэ.

— Ыраах сытар нэһилиэктэргэ эмчиттэр биригээдэлэрэ тиийэн, нэһилиэнньэ махталын ылаллар. 22 оройуоҥҥа көһө сылдьар көмө оҥоһуллубутуттан биэһэ – Арктика уонна хоту улуустарга киирсэр. Бу улуустарга барыта 3891 киһи доруобуйатын көрдөрүннэ.

— Оҕону ЭКО ньыматынан үөскэтии Саха сиригэр 1998 сылтан саҕаламмыта. Билигин бу ньыманан оҕону төрөтүү 40 бырыһыана көдьүүстээҕэ бэлиэтэнэр.

— Кыра оҕо өлүүтэ биллэ аҕыйаата (1000 төрөөбүт оҕоҕо – 5,3 промилле).

— Аҥардас биир сылга “Суһал көмө” 27 массыыната атыылаһыллан улуустарга тарҕатылынна. Үчүгэйэ диэн, бу массыыналар суһал көмөҕө наадалаах аныгы тэриллэринэн толору.

— Санитарнай авиацияны сайыннарыы боппуруоһа федеральнай таһымҥа быһаарыллар. Санавиацияны сайыннарарга быйыл 1 миллиард 300 мөл солк көрүллүө (403 мөлүйүөнэ – федеральнай бүддьүөттэн). Өрөспүүбүлүкэ суһал медицинаҕа анаан икки саҥа сөмөлүөтү сакаастаата.

РФ Президенэ Владимир Путин 2012 сыл ыам ыйынааҕы Ыйааҕа олоххо киллэриллэр. Быраастар орто хамнастара Саха сиригэр – 55990 тэннэстэ.

ххх

Инникитин сүрэх-тымыр реконструктивнай хирургията, торакальнай хирургия, неврология, онкология, кохлеарнай имплантация уо.д.а. хайысхалар сайдыахтара. Миниистир эппитинэн, сылга 15 кэриҥэ оҕо “тугоухостаах” төрүүр буоллаҕына, кохлеарнай имплантация көмөтүнэн бу сыыппара аҕыйыаҕар эрэл баар. Уорганы көһөрүү ньымаларын элбэтиигэ “бионическай харах” көмөтүнэн киһини көрөр оҥоруу технологиятын сайыннарыыга уо.д.а. болҕомто өссө күүскэ ууруллуоҕа. Быйыл харах дьэҥкир бүрүөтүн көһөрүүгэ 12 эпэрээссийэ ситиһиилээхтик оҥоһуллубута элбэҕи этэр. Ыарыһахтар сүһүөхтэригэр оҥорторбут протезтарын кэккэ сылынан уларытыы (реэндопротезирование) боппуруоһун миниистир эмиэ болҕомтоҕо ылла.

Кистэл буолбатах, кэрэ аҥаардар доруобуйаларын көрдөрүнэллэригэр анал поликлиникалар, балыыһалар, отделениелар баар эбит буоллахтарына, эр киһи анаан-минээн көрдөрүнэригэр тустаах балыыһа аҕыйаҕа кинилэр олохторун уһуна кылгыырыгар эмиэ оруоллаах. Онон быйылгыттан доруобуйа харыстабылын салаатыгар биир сүҥкэн соругунан “Эр киһи доруобуйата” бырайыагы олоххо киллэрии буолуоҕа.

Доруобуйа харыстабылын миниистирэ Михаил Охлопков суруналыыстар ыйытыыларыгар хоруйдаата, чугастааҕы соруктарга эмиэ тохтоото. Нэһилиэнньэ күүтэр Перинатальнай киинэ аһыллыыта кулун тутарга көһөрүлүннэ. Ол медицинскэй тэриллэри таҥыыны уонна лицензия боппуруостарын кытары сибээстээх.

0
0
comments powered by HyperComments