28 Кулун тутар 28.03
  • -13°
  • $ 92,26
  • 99,71

Мэҥэ хаҥаластар кыстыкка киирдилэр

14:44, 18 октября 2018
Текст:
Читайте нас на
Яндекс Новости
ЯДВ

Мэҥэ Хаҥалас оройуонун баһылыга Николай Старостин кыстыгы туоруур оту, сүөһү аһылыгын бэлэмнээһиҥҥэ туох кыалларынан күүстээх үлэ тэриллибитин, кыстыкка киирии тэрээһинэ түмүктэнэн эрэрин иһитиннэрдэ. Оттооһун былаана туолбут, 45000 тахса туонна бэлэмнэммит. Бу хаһааҥҥытааҕар да үрдүк былаан.


Мэҥэ Хаҥалас улууһугар хаһаайыстыбалар сиилэскэ былааннарын эмиэ толорбуттар, үгүөрү саппаас угуллубут. Онон кыстыгы этэҥҥэ туоруур усулуобуйа тэриллибитин баһылык эттэ. Бу күннэргэ улуустааҕы тыа хаһаайыстыбатын управлениетыгар нэһилиэктэринэн төһө ынах, сылгы сүөһү кыстыкка үктэммитин, ахсаанын чуолкайдыырга сорудахтанна.

Баһылык Николай Старостин балаҕан ыйыгар туттарыллыбыт үүт харчыта ситэ төлөнүллэ илигин эттэ. Оройуон дьокутааттарын Сэбиэтиттэн үүтү соҕотуопкалааччылар нөҥүө буолбакка, субсидия үбэ-харчыта туһааннаах туттарааччы аатыгар быһаччы түһэриллэрэ наадатын туһунан механизмын уларытарга этиини киллэрбитин эттэ. Күн бүгүн урукку сыллардааҕы туттарыллыбыт үүт харчыта элбэх нэһилиэккэ төлөнүллэ илик балаһыанньата баара биллэр. Сайыҥҥы үүт харчытын оннугар арыынан бэриллибитин, дьиҥинэн ыраас үбүнэн-харчынан төлөнүллүөхтээҕин, ити боппуруос суһаллык быһаарыллара наадатын тоһоҕолоон бэлиэтээтэ.

ОДьКХ салаатыгар кыһыҥҥыга бэлэмнэнии билигин да күүстээхтик салҕанар. Миэстэтигэр хочуолунайдарга өрөмүөн үлэтэ тэтимнээхтик ыытылларын, эппиэттээх кэмнэр туралларын салайааччы Илья Ильин эттэ.

Киин ититэр ситимҥэ чааһынай дьиэлээх ыаллар холбонуулара Бырамаҕа, Тиэлигигэ салҕанар, субсидия суох диэн олорон хаалбакка кэпсэтиһии быһыытынан үлэ-хамнас тэриллэр. Нэһилиэктэргэ чоҕу таһыы үлэтэ ыытыллар. Хочуолунайдарга носуостар, диискэллэр олус эргэрбиттэринэн болҕомтону уурар уолдьаспыт.

Ааптар: Марфа ПТИЦЫНА.

Следите за самым важным и интересным в Telegram-канале и WhatsApp-группе ЯСИА