От ыйын 21 күнүгэр биһиги улууспутуттан кыттыбыт «Азия оҕолоро» норуоттар икки ардыларынааҕы VI спортивнай Оонньуу кыайыылаахтарын, призердарын уонна тириэньэрдэри чиэстиир тэрээһин ыытылынна. Оонньууга улууспут чиэһин 24 эдэр спортсмен 10 успуорт көрүҥэр көмүскээтэ.
Улуустааҕы физическэй култуура уонна успуорт управлениетын салайааччыта Александр Брызгалов кыттааччыларга уонна тириэньэрдэргэ управление аатыттан Махтал суруктары туттарда.
Улуус баһылыга Николай Старостин: «Улууспутугар успуорт араас көрүҥнэригэр ситиһиилэр кэлэ туралларыттан үөрэбит. Эһиги оҕолор, улахан таһымнаах күрэхтэһиигэ эппиэтинэстээхтик сыһыаннаһан үчүгэй түмүктэри көрдөрдүгүт, бэйэҕит чугас дьоҥҥутугар, үөрэппит-такайбыт уһуйааччыларгытыгар үгүс үөрүүнү-көтүүнү бэлэхтээтигит. Биһиги улууспутугар успуорт араас көрүҥүн сайыннарыы ‒ ситиһиибит төрдө. Онон ыччаттарбыт сайынныннар диэн хаһан баҕарар, төһө да үп-харчы кырыымчык буоллар, успуорду инники күөҥҥэ өрө тута сылдьыахпыт», ‒ диэн эдэр спортсменнарга туһаайан эттэ.
Николай Старостин улуус аатыттан бириистээх миэстэлэргэ тиксибит спортсменнарга уонна тириэньэрдэргэ үөрүүлээх быһыыга-майгыга харчынан сэртипикээттэр туттартаата. Кинилэр истэригэр саха төрүт ыстаныытыгар кыайыылаах, Майатааҕы лиссиэй үөрэнээччитэ Дима Дмитриев, мас тардыһыыга 62 кг бастаабыт, Наахара орто оскуолатын үөрэнээччитэ Коля Васильев, мас тардыһыыга 52 кг кыайбыт, Моорук орто оскуолатын үөрэнээччитэ Артур Жирков, мас тардыһыыга үһүс миэстэлээх Георгий Лобанов (Моорук), пауэрлифтинг көрүҥэр иккис миэстэлээх Мичил Марков (Чүүйэ), ох саанан ытыыга иккис миэстэлээх Алексей Михайлов (Ф.Г.Охлопков аатынан Майа орто оскуолата), көҥүл тустууга үһүс миэстэни 54 кг ылбыт Уйгулаан Иванов, тхэквондоҕа үһүс буолбут Айна Забровская (Ф.Г.Охлопков аатынан Майа орто оскуолата), мас тардыһыыга 68 кг үһүс призер Петр Сергеев (Ороссолуода), мас тардыһыыга 74 кг үһүс миэстэни ылбыт Дмитрий Степанов (Майатааҕы лиссиэй), тириэньэрдэр: Борис Ильин, Михаил Петров, Николай Бояров, Милан Илларионов, Прокопий Васильев, Яков Филиппов, Аркадий Тастыгин, Василий Захаров,Павел Бочкарев, Александр Герасимов наҕараадаланнылар.
Спортсменнар ааттарыттан харда тылыгар Майатааҕы лиссиэй үөрэнээччитэ Дима Дмитриев: «Төрөөбүт улууспутугар бэриниилээх дьон буола улаатан, ханна да буолларбыт кини аатын чиэстээхтик көмүскүөхпүт«, — диэн эрэннэрдэ. Бэйэлэрин биир идэлээхтэригэр эҕэрдэтин тхэквондоҕа тириэньэр, Федеральнай Казначейство управлениетын салайааччыта Василий Захаров анаата уонна инникитин өссө да үрдүктэн үрдүк ситиһиилэри дабайарга баҕа санаатын тиэртэ.
