Ленинскэй Хомсомуол 100 сылын көрсө Дьаҥхаады нэһилиэгэр ”Көлүөнэтин чулуу ыччата, аямовец Виктор Яковлев” диэн саҥа кинигэ сүрэхтэниитэ буолан ааста.


Мэҥэ Хаҥалас Дьаҥхаадатыгар сүрэхтэммит кинигэҕэ АЯМ-ы тутууга үлэлэспит саха ыччатын лиидэрэ, «Саха комсомолеһа» этэрээт комиссара Виктор Никифорович Яковлев туһунан бииргэ үөскээбит, үөрэммит доҕотторун, үөлээннээхтэрин, учууталларын, алтыспыт дьонун, аймахтарын, биир дойдулаахтарын ахтыылара киирдилэр. Кини туһунан араас сылларга суруллубут ыстатыйалар, хаартыскалар, докумуоннар уо.д.а. матырыйааллар түмүллүбүттэр. Кинигэ ааҕааччы киэҥ араҥатыгар ананар.

Саҥа кинигэ сүрэхтэниитигэр бырааттара, балта, хаан-уруу аймахтара, оҕо сааһын уонна бииргэ үөрэммит доҕотторо Майдина Яковлева, Владимир Рожков, Зоя Скрябина, Алексей Павлуцкай, Дмитрий Шарин, бииргэ устудьуоннаабыт эдэр сааһын аргыстара Геннадий Скрябин, Эдуард Федоров, өр сылларга Дьокуускайга, Нерюнгрига бииргэ алтыспыт ыкса табаарыстара Анастасия, Андрей Васильевтар, билиигэ-көрүүгэ уһуйбут, үөрэппит-такайбыт учууталлара, педагогическай үлэ бэтэрээннэрэ        Нина Федоровна Колосова, Полина Скрыбыкина уо.д.а. кыттыыны ыллылар.

Оҕо ускуустубатын оскуолатын театральнай кылааһын үөрэнээччилэрэ Виктор Яковлев олоҕун сырдатар музыкальнай туруорууну көрдөрөн сэҥээриитин ыллылар (сал. Екатерина, Альберт Вензеллэр). Вокал кылааһын үөрэнээччилэрэ Жора Тихонов, Ярик Маслацов (сал. Лилия Стручкова), Уйгулаана Петрова, Люба Кочкина (сал. Анна Максимова) тойуктаан, хомустаан, ырыанан-тойугунан киэргэттилэр.

Тыл эппит дьон Саха сирин ыччатын ортотугар киэҥник биллибит, көлүөнэтин чулуу ыччата, биир дойдулаахпыт, оскуолабыт үөрэнээччитэ, аямовец Виктор Яковлев туһунан таһаарыы Хомсомуол 100 сылыгар сөп түбэспитэ сөптөөҕүн, кини аатын үйэтитэр, устуоруйаҕа  өйдөбүнньүк буоларын бэлиэтээтилэр. Бибилэтиэкэ үлэһиттэрэ “Хомсомуол ‒ дьылҕам сулуһа” кинигэ быыстапкатыгар Виктор Никифорович олоҕун-үлэтин сырдатар матырыйааллары, ыстатыйалары, хаартыскалары түмтүлэр.

Мустубут дьон Виктор оҕо сааһын, оскуолатааҕы, устудьуоннаабыт сылларын, үлэһит, салайааччы быһыытынан үлэлии сылдьыбыт кэмнэрин ахтан-санаан: “Кырдьык даҕаны, чахчы  ыраас дууһалаах, куруутун күлэн-үөрэн мичилийэн, сырдыгынан сыдьаайа сылдьыбыт, үлэлээн-хамсаан, кылгас да буоллар, чаҕылхай олоҕу олорон ааспыт эбит биһиги Бииктэрбит”, ‒ диэн санааларын үллэстэн аастылар.

Ааптардар: Капиталина Макарова, Любовь Яковлева

0
0
comments powered by HyperComments